म. टा. प्रतिनिधी, पुणे
महाराष्ट्र नवनिर्माण सेनेच्या उमेदवारांचा राज्यातील प्रचाराचा आरंभ पक्षाध्यक्ष राज ठाकरे येत्या बुधवारी (नऊ ऑक्टोबर) पुण्यातून करण्याची दाट चिन्हे आहेत. कोथरूडमध्ये भारतीय जनता पक्षाचे प्रदेशाध्यक्ष चंद्रकांत पाटील यांच्याविरोधात मनसेचे उमेदवार किशोर शिंदे यांना आघाडीने पाठिंबा दिल्याने याच मतदारसंघातून मनसेच्या प्रचाराचा नारळ फोडला जाईल, अशी शक्यता आहे.
लोकसभा निवडणुकांच्या पाठोपाठ विधानसभा निवडणूक लढवायची की नाही, याबाबत मनसेमध्ये सुरुवातीला संभ्रमावस्था होती. मात्र, आता राज्यातील शंभरहून अधिक मतदारसंघांमध्ये मनसेने उमेदवार उभे केले आहेत. येत्या सोमवारी अर्ज माघारीची मुदत संपल्यानंतर प्रचाराला खऱ्या अर्थाने रंगत येणार आहे. प्रचारासाठी मिळणाऱ्या १०-१२ दिवसांमध्ये महत्त्वाच्या मतदारसंघांमध्ये ठाकरे यांच्या सभा होणार असून, त्याची सुरुवात पुण्यातून होण्याचे संकेत मिळत आहेत. नऊ ऑक्टोबरपासून राज ठाकरे यांच्या प्रचाराचा झंझावात सुरू होणार आहे. मनसेच्या शहरातील सर्व उमेदवारांच्या प्रचारासाठी त्यांची पहिलीच सभा कोथरूड मतदारसंघात घेण्याचे नियोजन केले जात आहे. कोथरूड, कसबा पेठ, हडपसर, कँटोन्मेंट, शिवाजीनगर अशा पाच मतदारसंघांत मनसेने उमेदवार दिले आहेत. या सर्वांच्या प्रचारासाठी एकत्रित सभा घेतली जाईल, असे चित्र आहे. त्यानंतर ठाकरे राज्याच्या इतर भागांमध्येही सभा घेणार आहेत.
..............
ओवेसींची उद्या सभा
बहुतांश राजकीय पक्षाच्या नेत्यांच्या सभांना पुढील आठवड्यात सुरुवात होणार असली, तरी 'एमआयएम'चे नेते असदुद्दीन ओवेसी यांची सभा येत्या रविवारी (सहा ऑक्टोबर) नाना पेठेतील महात्मा फुले कॉलेजच्या मैदानावर होणार आहे. विधानसभेसाठी २१ ऑक्टोबरला सोमवारी मतदान होणार असल्याने शनिवारी १९ ऑक्टोबरला प्रचाराची सांगता होईल. त्यामुळे राजकीय पक्षांना सहा आणि १३ ऑक्टोबर असे दोनच रविवार प्रचारसभांसाठी मोकळे मिळणार आहेत.
...................