म. टा. प्रतिनिधी, पुणे
विधानसभा निवडणुकीच्या पार्श्वभूमीवर पुणे पोलिस आयुक्तालयात सर्व राजकीय पक्षांच्या प्रतिनिधींची समन्वयक बैठक नुकतीच पार पडली. या बैठकीमध्ये राजकीय पक्षांच्या प्रतिनिधींशी चर्चा करून आयुक्तांनी त्यांच्या अडीअडचणी समजून घेतल्या. राजकीय पक्षांकडून मुख्यत्वे सभांसाठी मैदानांबाबत प्रश्न उपस्थित करण्यात आला.
पुण्याचे पोलिस आयुक्त डॉ. के. व्यंकटेशम्, सहआयुक्त डॉ. रवींद्र शिसवे, अतिरिक्त आयुक्त अशोक मोराळे, संजय शिंदे, उपायुक्त मितेश घट्टे या वेळी उपस्थित होते. पोलिस आयुक्तांनी सर्व राजकीय पक्षाच्या प्रतिनिधींना त्यांच्या अडीअडचणी मांडण्यास सांगितले. त्या वेळी राजकीय पक्षांच्या प्रतिनिधींनी विविध मुद्दे उपस्थित केले. त्याला आयुक्त, सहआयुक्तांनी उत्तरे दिली. प्रचाराला कमी वेळ मिळत असल्यामुळे प्रामुख्याने प्रचार सभेच्या मैदानावर या वेळी चर्चा झाली. घट्टे यांनी प्रचार सभेसाठी दिल्या जाणाऱ्या मैदानाचे नियम राजकीय पक्षांच्या प्रतिनिधींना सांगितले. त्या वेळी काही जणांनी मैदाने मिळत नसल्यामुळे रस्त्यावर सभा घेण्यास परवानगी देण्याची मागणी केली. राजकीय पक्षांचे कोणकोणते स्टार प्रचारक पुण्यात येणार आहेत, याची माहितीही काही पक्षांनी दिली. या पार्श्वभूमीवर आणखी काही दिवसांनी पुन्हा एकदा ही बैठक होणार असल्याचे पोलिसांकडून सांगण्यात आले.