म. टा. प्रतिनिधी, पुणे
ओडिशा येथे दाखल गुन्ह्यात सीबीआयने समृद्ध जीवनचे प्रमुख महेश मोतेवारच्या विरोधात कोर्टात दोषारोपपत्र दाखल केले आहे. मोतेवारच्या कंपनीने चिटफंडामार्फत साडेतीन कोटींची फसवणूक केल्याचे म्हटले आहे.
समृद्ध जीवनच्या विरोधात महाराष्ट्रातही गुन्हे दाखल आहेत. कंपनीचे कार्यालय पुण्यात आहे. ओडिशा येथे कोर्टाच्या आदेशावरून सीबीआयने २०१३ मध्ये गुन्हा दाखल केला होता. महाराष्ट्र पोलिसांनी मोतेवारला अटक केल्यानंतर ओडिशा येथील गुन्ह्यात त्याचा ताबा घेण्यात आला. या गुन्ह्याचा तपास करून सीबीआयने दोषारोपपत्र दाखल केले. समृद्ध जीवनच्या नावाने वेगवेगळ्या स्कीम काढून ३५ लाख ग्राहकांकडून चार हजार ३२० कोटी रुपये गोळा करण्यात आले आहेत. त्यापैकी फक्त ८३६ कोटी रुपये परत दिले आहेत. इतर ग्राहकांचे पैसे परत न करता फसवणूक केल्याचे सीबीआयने म्हटले आहे.