म. टा. प्रतिनिधी, पुणे
राष्ट्रीय संरक्षण प्रबोधिनी अर्थात 'एनडीए'च्या १३७व्या तुकडीचे दीक्षान्त संचलन ३० नोव्हेंबरला होणार आहे. या वेळी संरक्षण मंत्री राजनाथ सिंह संचलनाची मानवंदना स्वीकारतील. दीक्षान्त संचलनाच्या निमित्ताने 'एनडीए'मध्ये विविध उपक्रमांचे आयोजन करण्यात आले आहे, अशी माहिती संरक्षण मंत्रालयाच्या प्रवक्त्यांनी बुधवारी दिली.
'एनडीए' ही संरक्षण मंत्रालयाची तिन्ही सशस्त्र दलांचे एकत्रित प्राथमिक प्रशिक्षण देणारी देशातील एकमेव संस्था आहे. यंदा १३७ वी तुकडी 'एनडीए'तील तीन वर्षांचे खडतर प्रशिक्षण संपवून पुढील प्रशिक्षणासाठी बाहेर पडेल. 'एनडीए'च्या छात्रांनी विविध क्लबसाठी केलेले प्रकल्प, कलाकृतींचे प्रदर्शन म्हणजेच 'एनडीए एक्स्पो'चे उद्घाटन २७ नोव्हेंबरला होईल. २९ नोव्हेंबरला १३७व्या तुकडीचा पदवीप्रदान सोहळा होईल. शिलाँग येथील नॉर्थ ईस्टर्न हिल युनिव्हर्सिटीचे कुलगुरू प्रा. एस. के. श्रीवास्तव यांच्या हस्ते विद्यार्थ्यांना पदवी प्रमाणपत्र प्रदान केले जाईल. याच दिवशी सकाळी साडेसात वाजता अश्वारोहण प्रात्यक्षिके सादर होतील, तर सायंकाळी लाइट अँड साउंड शो (केवळ निमंत्रितांसाठीच) सादर होईल. ३० नोव्हेंबरला सकाळी दीक्षान्त संचलन होईल.