नागरिकांना दूषित पाण्याचा पुरवठा

म. टा. प्रतिनिधी, हडपसर

गजानन कॉलनी येथे अॅसिडमिश्रित पाण्याचा प्रवाह आल्याने नागरिकांना त्रास सहन करावा लागला. नागरिकांच्या तक्रारीची दखल घेऊन महापालिका कर्मचारी व पालिका विरोधी पक्षनेत्यांनी तातडीने पाणीपुरवठा बंद केल्याने दूषित पाण्यापासून होणारी हानी टळली.

पिण्याच्या पाणी अचानक दूषित येण्यास सुरुवात झाली. या पाण्याने डोळ्यात आग होणे, हाताला खाज येण्यास सुरुवात झाली. नागरिकांनी विरोधी पक्षनेते व नगरसेवक चेतन तुपे यांच्याशी संपर्क साधला, तेव्हा ते सभागृहात होते. त्यांनी नागरिकांच्या तक्रारीची दखल घेऊन पालिका अधिकाऱ्यांना कळविले व पाणीपुरवठा बंद केला. पालिकेचे अधिकारी सुभाष पावरा यांच्यासह चेतन तुपे यांनी घटनास्थळी पाहणी केली. नळाचे पाणी न वापरण्याच्या सूचना नागरिकांना देण्यात आल्या. पाणी पिण्यासाठी वेगळा पाण्याचा टँकर पाठवण्यात आला असून पाणी न वापरण्याचे आवाहन चेतन तुपे यांनी नागरिकांना केले. 'अॅसिडयुक्त पाणी तपासणीसाठी घेतले आहे. घाण पाणी ड्रेनेजचे किंवा इतर जलवाहिनीमध्ये आल्याने महिलांना त्रास झाला,' अशी माहिती विरोधीपक्ष नेता चेतन तुपे यांनी दिली होती. 'आम्ही पाहणी केली आहे. येथील जलवाहिनी पूर्ण स्वच्छ करून सुरळीत पाणी सोडले जाईल,' असे पाणीपुरवठा अधिकारी सुभाष पावरा यांनी सांगितले.