म. टा. प्रतिनिधी, पिंपरी
टपरीधारकाला आत्महत्येस प्रवृत्त केल्याप्रकरणी भाजपच्या नगरसेविका सुजाता पालांडे, त्यांचे पती सुनील पालांडे आणि आत्महत्या केलेल्या टपरीधारकाच्या पत्नीच्या विरोधात पिंपरी पोलिस ठाण्यात गुन्हा दाखल करण्यात आला आहे. दरम्यान, टपरीधारकाला पालांडे कुटुंबीय आणि त्यांच्या कार्यकर्त्यांकडून त्रास होत असून, त्यांच्या जीवाला धोका आहे असे निवेदन त्याच्या पत्नीने पिंपरी पोलिसांना यापूर्वी दिले होते.
नेहरूनगर येथे फॅब्रिकेशनचा व्यवसाय करणारे टपरीधारक सचिन सुरेश ढवळे (रा. संत तुकाराम नगर, पिंपरी) यांनी सोमवारी (२८ मे) गळफास घेऊन आत्महत्या केली. आत्महत्या करण्यापूर्वी त्यांनी चिठ्ठी लिहून ठेवली होती. त्यामध्ये भाजप नगरसेविका सुजाता सुनील पालांडे यांच्या त्रासाला कंटाळून आत्महत्या करत असल्याचे लिहिले होते. याबाबत सचिन यांचा भाऊ शरद सुरेश ढवळे (३८) यांनी पिंपरी पोलिस ठाण्यात फिर्याद दिली आहे. त्यानुसार पालांडे यांच्यासह सचिन ढवळे यांची पत्नी शशिकला सचिन ढवळे (४०, रा. संत तुकारामनगर, पिंपरी) यांच्यासह अन्य काही कार्यकर्त्यांविरोधात आत्महत्येस प्रवृत्त केल्याप्रकरणी गुन्हा दाखल करण्यात आला आहे. सुजाता पालांडे या प्रभाग क्रमांक २० संत तुकारामनगर मधील भाजपच्या नगरसेविका आहेत. पिंपरी पोलिस तपास करत आहेत.
-------------