म. टा. प्रतिनिधी, पुणे
पुणे महापालिकेच्या कोव्हिड केअर सेंटर आणि जम्बो रुग्णालयात रेमडेसिव्हिरचा तुटवडा असल्याने रुग्णांच्या नातेवाइकांवर इंजेक्शन मिळवण्यासाठी शहरभर वणवण फिरण्याची वेळ आली आहे. पुणे महापालिकेने रुग्णसंख्या वाढल्यानंतर कोव्हिड केअर सेंटर आणि जम्बो रुग्णालय सुरू केले खरे; पण येथे दाखल असणाऱ्या रुग्णांसाठी पुरेशा प्रमाणात 'रेमडेसिव्हिर'चा साठा करून ठेवलेला नाही. त्यामुळे अख्खे शहरही पालथे घालून इंजेक्शन मिळत नसल्याचे समोर येत आहे.
शहरात फेब्रुवारीपासून करोनाचा संसर्ग पुन्हा वेगाने वाढू लागला. त्यामुळे शहरातील सक्रिय, ऑक्सिजनवरील तसेच गंभीर रुग्णांच्या संख्येत वाढ होत आहे. त्यासाठी महापालिकेने शहरात जम्बो रुग्णालय, बाणेर येथे तसेच लायगुडे, खेडेकर या रुग्णालयांमध्ये रुग्णांची व्यवस्था केली आहे. मात्र, तेथील रुग्णांवरील उपचारासाठी 'रेमडेसिव्हिर'ची मागणी वाढली आहे. बाणेर, जम्बो सेंटरसह अन्य कोव्हिड केअर सेंटरमध्ये उपचार घेणाऱ्या रुग्णांना 'रेमडेसिव्हिर' पुरेशा प्रमाणात मिळत नसल्याने तेथून 'प्रीस्क्रिप्शन' घेऊन इंजेक्शन मिळवण्यासाठी रुग्णांच्या नातेवाइकांवर शहरभर फिरण्याची वेळ ओढावली आहे. त्यामुळे शहरात गेल्या दोन ते तीन दिवसांपासून अचानकपणे 'रेमडेसिव्हिर'च्या इंजेक्शनची मागणी वाढल्याचे दिसून आले आहे.
'गेल्या दोन तीन दिवसांपासून जम्बो रुग्णालय, बाणेरच्या कोव्हिड सेंटरमधून डॉक्टरांसह रुग्णांकडून आमच्याकडे रेमडेसिव्हिरची मागणी करण्यात येत आहे. त्यामुळे केमिस्ट असोसिएशन ऑफ पुणे डिस्ट्रिक्टच्या (सीएपीडी) कार्यालयाच्या बाहेर रेमडेसिव्हिरच्या खरेदीसाठी रुग्णांच्या नातेवाइकांची गर्दी वाढली आहे,' असे औषध विक्रेता संघटनेचे पश्चिम महाराष्ट्र विभागाचे सहसचिव दत्तप्रसाद टोपे यांनी सांगितले.
पुण्यासाठी सहा हजार इंजेक्शन
'पश्चिम महाराष्ट्रात १७ हजार रेमडेसिव्हिर इंजेक्शनचा साठा उपलब्ध झाला आहे. त्यातील पाच ते सहा हजार इंजेक्शन पुण्याला मिळणार असून, शुक्रवारी वितरण केले जाईल. त्यामुळे शहरातील रुग्णांना इंजेक्शन उपलब्ध होतील,' अशी माहिती 'एफडीए'च्या अधिकाऱ्यांनी दिली.
महापालिकेने नव्याने कोव्हिड केअर सेंटर सुरू करताना रुग्णांच्या संख्येनुसार पुरवठादारांकडून रेमडेसिव्हिरची आगाऊ खरेदी करणे आवश्यक आहे. त्यामुळे शहरात तुटवडा निर्माण होणार नाही. कोव्हिड केअर सेंटरमध्ये इंजेक्शन उपलब्ध झाल्यास रुग्णांच्या नातेवाइकांची धावपळ थांबेल.
- एस. बी. पाटील, सहआयुक्त, एफडीए
रेमडेसिव्हिरच्या खरेदीसाठी एक कोटी रुपयांच्या निविदा काढण्यात आल्या आहेत. महापालिकेने दुसऱ्या लाटेसाठी रेमडेसिव्हिर तसेच अन्य साहित्यांच्या खरेदीसाठी सुरुवात केली आहे. कोव्हिड केअर सेंटर, जम्बो रुग्णालयात रेमडेसिव्हिर उपलब्ध आहे की नाही, याची माहिती घेण्यात येईल.
- डॉ. आशिष भारती, आरोग्यप्रमुख
मटा भूमिका
गेल्या तीन-चार दिवसांपासून रेमडेसिव्हिर इंजेक्शनचा तुटवडा आहे. काही ठरावीक वितरकांकडे ही इंजेक्शन उपलब्ध असल्याने गेल्या दोन दिवसांपासून ती मिळविण्यासाठी तोबा गर्दी होत आहे. करोना रुग्णावरील उपचारांसाठी या इंजेक्शनला सर्वाधिक मागणी आहे. त्यामुळे हे इंजेक्शन मिळवण्यासाठी रुग्णाच्या नातेवाइकांकडून जीवाचे रान केले जात आहे. फक्त पुणेच नाही, तर पुण्याबाहेरून अनेक रुग्णांचे नातेवाइक इंजेक्शन खरेदीसाठी शहरात येत आहेत. मात्र, पुरेसा साठा उपलब्ध नसल्याने त्यांना अनेक हेलपाटे मारावे लागत आहेत. जम्बो रुग्णालय सुरू करायचा निर्णय झाल्यावर महापालिकेनेही संभाव्य रुग्णवाढ लक्षात घेऊन इंजेक्शन खरेदीसाठी पावले उचलण्याची गरज होती. दुर्दैवाने पालिकेकडून दुर्लक्ष केले गेले. करोनाकाळात इतर खरेदीसाठी सर्रास ६७ क कलमाचा वापर केला जात असताना या इंजेक्शनसाठी निविदा प्रक्रिया राबविली जात आहे. या सगळ्यामध्ये रुग्ण आणि नातेवाइकांना नाहक त्रास होत असून, या इंजेक्शनसाठी ठिकठिकाणी धावाधाव करावी लागण्यापेक्षा ते केंद्रीय पद्धतीने उपलब्ध करून देण्याची गरज आहे.
पुणे महापालिकेच्या कोव्हिड केअर सेंटर आणि जम्बो रुग्णालयात रेमडेसिव्हिरचा तुटवडा असल्याने रुग्णांच्या नातेवाइकांवर इंजेक्शन मिळवण्यासाठी शहरभर वणवण फिरण्याची वेळ आली आहे. पुणे महापालिकेने रुग्णसंख्या वाढल्यानंतर कोव्हिड केअर सेंटर आणि जम्बो रुग्णालय सुरू केले खरे; पण येथे दाखल असणाऱ्या रुग्णांसाठी पुरेशा प्रमाणात 'रेमडेसिव्हिर'चा साठा करून ठेवलेला नाही. त्यामुळे अख्खे शहरही पालथे घालून इंजेक्शन मिळत नसल्याचे समोर येत आहे.
शहरात फेब्रुवारीपासून करोनाचा संसर्ग पुन्हा वेगाने वाढू लागला. त्यामुळे शहरातील सक्रिय, ऑक्सिजनवरील तसेच गंभीर रुग्णांच्या संख्येत वाढ होत आहे. त्यासाठी महापालिकेने शहरात जम्बो रुग्णालय, बाणेर येथे तसेच लायगुडे, खेडेकर या रुग्णालयांमध्ये रुग्णांची व्यवस्था केली आहे. मात्र, तेथील रुग्णांवरील उपचारासाठी 'रेमडेसिव्हिर'ची मागणी वाढली आहे. बाणेर, जम्बो सेंटरसह अन्य कोव्हिड केअर सेंटरमध्ये उपचार घेणाऱ्या रुग्णांना 'रेमडेसिव्हिर' पुरेशा प्रमाणात मिळत नसल्याने तेथून 'प्रीस्क्रिप्शन' घेऊन इंजेक्शन मिळवण्यासाठी रुग्णांच्या नातेवाइकांवर शहरभर फिरण्याची वेळ ओढावली आहे. त्यामुळे शहरात गेल्या दोन ते तीन दिवसांपासून अचानकपणे 'रेमडेसिव्हिर'च्या इंजेक्शनची मागणी वाढल्याचे दिसून आले आहे.
'गेल्या दोन तीन दिवसांपासून जम्बो रुग्णालय, बाणेरच्या कोव्हिड सेंटरमधून डॉक्टरांसह रुग्णांकडून आमच्याकडे रेमडेसिव्हिरची मागणी करण्यात येत आहे. त्यामुळे केमिस्ट असोसिएशन ऑफ पुणे डिस्ट्रिक्टच्या (सीएपीडी) कार्यालयाच्या बाहेर रेमडेसिव्हिरच्या खरेदीसाठी रुग्णांच्या नातेवाइकांची गर्दी वाढली आहे,' असे औषध विक्रेता संघटनेचे पश्चिम महाराष्ट्र विभागाचे सहसचिव दत्तप्रसाद टोपे यांनी सांगितले.
पुण्यासाठी सहा हजार इंजेक्शन
'पश्चिम महाराष्ट्रात १७ हजार रेमडेसिव्हिर इंजेक्शनचा साठा उपलब्ध झाला आहे. त्यातील पाच ते सहा हजार इंजेक्शन पुण्याला मिळणार असून, शुक्रवारी वितरण केले जाईल. त्यामुळे शहरातील रुग्णांना इंजेक्शन उपलब्ध होतील,' अशी माहिती 'एफडीए'च्या अधिकाऱ्यांनी दिली.
महापालिकेने नव्याने कोव्हिड केअर सेंटर सुरू करताना रुग्णांच्या संख्येनुसार पुरवठादारांकडून रेमडेसिव्हिरची आगाऊ खरेदी करणे आवश्यक आहे. त्यामुळे शहरात तुटवडा निर्माण होणार नाही. कोव्हिड केअर सेंटरमध्ये इंजेक्शन उपलब्ध झाल्यास रुग्णांच्या नातेवाइकांची धावपळ थांबेल.
- एस. बी. पाटील, सहआयुक्त, एफडीए
रेमडेसिव्हिरच्या खरेदीसाठी एक कोटी रुपयांच्या निविदा काढण्यात आल्या आहेत. महापालिकेने दुसऱ्या लाटेसाठी रेमडेसिव्हिर तसेच अन्य साहित्यांच्या खरेदीसाठी सुरुवात केली आहे. कोव्हिड केअर सेंटर, जम्बो रुग्णालयात रेमडेसिव्हिर उपलब्ध आहे की नाही, याची माहिती घेण्यात येईल.
- डॉ. आशिष भारती, आरोग्यप्रमुख
मटा भूमिका
गेल्या तीन-चार दिवसांपासून रेमडेसिव्हिर इंजेक्शनचा तुटवडा आहे. काही ठरावीक वितरकांकडे ही इंजेक्शन उपलब्ध असल्याने गेल्या दोन दिवसांपासून ती मिळविण्यासाठी तोबा गर्दी होत आहे. करोना रुग्णावरील उपचारांसाठी या इंजेक्शनला सर्वाधिक मागणी आहे. त्यामुळे हे इंजेक्शन मिळवण्यासाठी रुग्णाच्या नातेवाइकांकडून जीवाचे रान केले जात आहे. फक्त पुणेच नाही, तर पुण्याबाहेरून अनेक रुग्णांचे नातेवाइक इंजेक्शन खरेदीसाठी शहरात येत आहेत. मात्र, पुरेसा साठा उपलब्ध नसल्याने त्यांना अनेक हेलपाटे मारावे लागत आहेत. जम्बो रुग्णालय सुरू करायचा निर्णय झाल्यावर महापालिकेनेही संभाव्य रुग्णवाढ लक्षात घेऊन इंजेक्शन खरेदीसाठी पावले उचलण्याची गरज होती. दुर्दैवाने पालिकेकडून दुर्लक्ष केले गेले. करोनाकाळात इतर खरेदीसाठी सर्रास ६७ क कलमाचा वापर केला जात असताना या इंजेक्शनसाठी निविदा प्रक्रिया राबविली जात आहे. या सगळ्यामध्ये रुग्ण आणि नातेवाइकांना नाहक त्रास होत असून, या इंजेक्शनसाठी ठिकठिकाणी धावाधाव करावी लागण्यापेक्षा ते केंद्रीय पद्धतीने उपलब्ध करून देण्याची गरज आहे.