म. टा. प्रतिनिधी, पुणे बंगल्यामध्ये रंगकाम करण्यासाठी आलेल्या व्यक्तीने घरात शिरून महिलेच्या गळ्याला चाकू लावून लुटण्याची घटना मंगळवारी अरण्येश्वर येथे घडली. याप्रकरणी दोन व्यक्तींच्या विरोधात जबरी चोरीच्या प्रयत्नाचा गुन्हा दाखल केला असून, एकाला अटक करण्यात आली आहे. याबाबत अरुणा देशमुख (वय ५२, रा. अरण्येश्वर) यांनी तक्रार दिली आहे. त्यावरून अक्षय लक्ष्मण थोरात (रा. तळजाई वसाहत) व आणखी एका व्यक्तीवर गुन्हा दाखल करण्यात आला आहे. या प्रकरणी पोलिसांनी थोरातला अटक केली आहे. पोलिसांनी दिलेल्या माहितीनुसार, देशमुख या अरण्येश्वर परिसरात राहतात. त्यांनी काही दिवसांपूर्वीच बंगल्याचे रंगकाम आरोपी थोरात याच्याकडून करून घेतले होते. मात्र, बंगल्याचे टचअप काढायचे असल्याचे सांगून थोरात हा मंगळवारी सायंकाळी सव्वाचारच्या सुमारास त्यांच्या घरी आला. त्या वेळी त्याच्या सोबत आणखी एक व्यक्ती होती. दोघांनी घरात शिरून इकडे-तिकडे पाहिले. घरात कोणी नसल्याचा फायदा घेत थोरात याच्यासोबत असलेल्या व्यक्तीने देशमुख यांच्या गळ्याला सुरी लावली. आणि त्यांच्याकडे पैशाची मागणी केली. पण, त्या वेळी घरामध्ये काम करत असलेली महिला नोकर छाया हिला देशमुख यांनी आवाज दिला. त्या वेळी थोरातने देशमुख यांचे तोंड दाबण्याचा प्रयत्न केला. देशमुख यांचा आवाज ऐकून काम करणारी महिला धावत आली. हे पाहून आरोपी घरातून पळून गेले. त्यानंतर देशमुख यांनी घटनेची माहिती कुटुंबीयांना व सहकारनगर पोलिसांना दिली. याप्रकरणी पोलिस उपनिरीक्षक एस. एम. खानविलकर हे अधिक तपास करत आहेत.
चाकूच्या धाकाने महिलेला लुटण्याचा प्रयत्न
बंगल्यामध्ये रंगकाम करण्यासाठी आलेल्या व्यक्तीने घरात शिरून महिलेच्या गळ्याला चाकू लावून लुटण्याची घटना मंगळवारी अरण्येश्वर येथे घडली. याप्रकरणी दोन व्यक्तींच्या विरोधात जबरी चोरीच्या प्रयत्नाचा गुन्हा दाखल केला असून, एकाला अटक करण्यात आली आहे.
महाराष्ट्र टाइम्स.कॉम 28 Apr 2016, 4:29 am