हद्दीच्या वादात गुन्हा अडकला

म. टा. प्रतिनिधी, येरवडा/ पुणे
अमेरिकन डॉलर कमी किंमतीमध्ये देण्याच्या आमिषाने तरुणाला साबणाची वडी देऊन फसवणूक केल्याच्या गुन्हा येरवडा आणि विमातळ पोलिस ठाण्यांच्या हद्दीच्या वादात दोन दिवस अडकला. या हद्दीच्या वादात गुन्हा वेळेवर दाखल न झाल्यामुळे चोरटे पसार झाले. येरवडा पोलिसांनी झीरो क्रमांकाने दाखल केलेला गुन्हा विमानतळ पोलिसांनी घेतला नसल्याचा प्रकार वरिष्ठांच्या कानावर गेला. त्यांनी यामध्ये लक्ष घातल्यानंतर त्यांच्या आदेशामुळे येरवडा पोलिसांनी मंगळवारी हा गुन्हा दाखल केला.
याबाबत विशाल विजय गायकवाड (वय २३, रा. मोझे आळी, लोहगाव) याने तक्रार दिली आहे. त्यावरून पोलिसांनी फसवणुकीचा गुन्हा दाखल केला आहे. पोलिसांकडून मिळालेल्या माहितीनुसार, विशाल गायकवाड याचे वडगाव शिंदे रस्त्यावर मोबाइलचे दुकान आहे. मोबाइल खरेदी करण्याच्या बहाण्याने एक तरुण दुकानात आला. या वेळी आपल्याकडे सध्या वीस अमेरिकन डॉलर असून त्याचे किती पैसे मिळतील, अशी विचारणा केली. त्यावर त्याचे साठ रुपयेप्रमाणे बाराशे रुपये येतील, असे त्याने सांगितले. त्यावर आपल्या मित्राच्या मावशीकडे दीड हजारहून अधिक अमेरिकन डॉलरच्या नोटा असून त्या विक्री करून दिल्यास त्यातील काही रक्कम देण्याचे आश्वासन दिले. त्यानंतर रविवारी संबंधित तरुणाने गायकवाड याला येरवड्यात बोलावून घेतले. त्या वेळी त्याच्यासोबत आणखी दोन जण साथीदार होते. आपल्याकडे अमेरिकन चलन असून ते विकून पाच लाख रुपये देण्याची मागणी आरोपींनी केली. त्यामुळे गायकवाड याने मित्राकडून चार लाख रुपये उसने घेतले. रविवारी रात्री तो येरवड्यात गेला. त्या वेळी आरोपी दोन-तीन अमेरिकन डॉलर दाखवून कापडी पिशवी देऊन चार लाख रुपये घेऊन निघून गेले. गायकवाड यांनी पिशवी तपासल्यावर त्यात रुमालात कागदाचे बंडल आणि साबणाची वडी असल्याचे दिसून आले. त्यानंतर त्याने नियंत्रण कक्षाशी संपर्क साधला.
येरवडा पोलिसांनी या गुन्ह्याची सुरुवात लोहगाव येथे तक्रारदाराच्या दुकान झाली असल्याचे सांगून गुन्हा झीरो क्रमांकाने दाखल करून घेतला. तो गुन्हा सोमवारी विमानतळ पोलिसांकडे पाठविला होता. पण, हा प्रकार त्यांच्या हद्दीत घडला नसल्याचे कारण देऊन त्यांनी गुन्हा दाखल करून घेण्यास नकार दिला. रविवारी घडलेला गुन्हा मंगळवार दुपारपर्यंत दाखल झाला नाही. तसेच, त्याचा तपासही सुरू झाला नाही. हा प्रकार वरिष्ठ अधिकाऱ्यांच्या कानावर गेला. त्यामुळे त्यांनी अखेर येरवडा पोलिसांना गुन्हा दाखल करण्याचे आदेश दिले. त्यानुसार मंगळवारी येरवडा पोलिस ठाण्यात गुन्हा दाखल करून घेत तपासाला सुरुवात केली आहे. मात्र, दोन पोलिस ठाण्यांतील हद्दीच्या वादात गुन्हा दाखल होऊन तपासाला सुरुवात होण्यास दोन दिवस गेले होते.

लोहगाव येथील वडगाव शिंदेमध्ये फिर्यादीचे दुकान आहे. त्या ठिकाणी गुन्ह्याला सुरुवात झाली. मात्र, पैशाचा व्यवहार येरवडा हद्दीत झाल्याने येरवडा पोलिसांनी रविवारीच फसवणुकीचा गुन्हा दाखल केला आहे.
- मुकुंद महाजन, वरिष्ठ पोलिस निरीक्षक, येरवडा पोलिस ठाणे