भविष्य सांगण्याच्या बहाण्याने गंडवले

पुणे : घरातील समस्या आणि भविष्य सांगतो म्हणून एका व्यक्तीने नऊ हजार रुपये व रोख रक्कम असा २४ हजार रुपयांचा मुद्देमाल फसवणूक करून नेला. गरुड गणपतीजवळील उमा निवास येथे येथे गुरुवारी सकाळी ही घटना घडली. या प्रकरणी विश्रामबाग पोलिस ठाण्यात गुन्हा दाखल करण्यात आला आहे.
याबाबत ५६ वर्षीय महिलेने तक्रार दिली आहे. त्यावरून अज्ञात व्यक्तीच्या विरोधात गुन्हा दाखल करण्यात आला आहे. पोलिसांनी दिलेल्या माहितीनुसार, गरूड गणपतीजवळील उमा विलास सोसायटीत तक्रारदार राहण्यास आहेत. त्या नोकरी करतात. गुरुवारी सकाळी त्यांच्या सोसायटीत एक व्यक्ती भविष्य सांगण्यासाठी आली होती. त्या वेळी तक्रारदार यांच्या पतीची भेट झाली. त्यांनी त्यांना घरातील समस्यांबद्दल सांगितल्यानंतर त्या दूर करून भविष्य सांगतो असे त्याने सांगितले. त्यामुळे तक्रारदार यांचे पती त्या व्यक्तीला घेऊन घरी आले. त्या व्यक्तीने तक्रारदार यांच्या पतीला समस्या दूर करण्यासाठी पूजा करावी लागेल, असे सांगितले. पूजेसाठी त्यांच्याकडून सोन्याची अंगठी घेतली. सोन्याची अंगठी व रोख रक्कम असा २४ हजार रुपयांचा ऐवज घेऊन ती व्यक्ती पसार झाली. हा प्रकार तक्रारदार यांना समजल्यानंतर त्यांनी विश्रामबाग पोलिसांकडे तक्रार दिली. त्यानुसार पोलिस हवालदार पवार हे अधिक तपास करत आहेत.