म. टा. प्रतिनिधी, पुणे
अठरा वर्षांपूर्वी खोटे प्रतिज्ञापत्र करून आणि मृत व्यक्तीचा खोटा अंगठा उमटवून महापालिकेचा स्थिर हातगाडीचा परवाना नावे करून घेणाऱ्या विरुद्ध स्वारगेट पोलिस ठाण्यात गुन्हा दाखल करण्यात आला आहे. उमेश जगन्नाथ नरुले (वय ४८, रा. वारजे) यांनी स्वारगेट पोलिस ठाण्यात फिर्याद दाखल केली आहे. त्यावरून राजेंद्र महादेव सावसे याच्यावर गुन्हा दाखल करण्यात आला आहे.
कै. माणिक सिद्राम पवार यांच्या नावे स्थिर हातगाडीचा परवाना आहे. आरोपीने तो परवाना आपल्या नावे करून घेण्याच्या उद्देशाने खोटे प्रतिज्ञापत्र बनवून, त्यावर खोटे हस्तांतरण पत्र तयार केले होते. तसेच, त्यावर मृत पवार यांचा खोटा अंगठा उमटवून कागदपत्रे महापालिकेच्या टिळक रस्ता क्षेत्रीय कार्यालयास सादर केली होती. तत्कालिन अतिक्रमण निरीक्षक गोपाळ सोनावणे यांच्या मदतीने आरोपीने तो परवाना स्वत:च्या नावावर करून घेतला. यामध्ये प्रतिज्ञापत्र आणि कागदपत्रे खोटी सादर करून आरोपीने महापालिकेची फसवणूक केली. त्यामुळे महापालिकेच्या वतीने अतिक्रमण निरीक्षक नरुले यांनी फिर्याद दिली, अशी माहिती स्वारगेट पोलिस ठाण्यातील उपनिरीक्षक सुनील जगदाळे यांनी दिली.
\B
काय आहे प्रकार ?
\Bकै. सिद्राराम पवार यांचा स्वारगेट येथे नेहरू स्टेडिअम परिसरात स्थिर हातगाडीचा परवाना होता. त्यांच्या निधनानंतर, २००० मध्ये आरोपीने खोट्या कागदपत्रांच्या आधारे तो परवाना स्वत:च्या नावावर करून घेतला होता. मृत पवार यांना दोन मुले असून, त्यांचा मुलगा ज्ञानेश्वर पवार याने यासंदर्भात महापालिकेकडे तक्रार केली होती. महापालिकेकडून संबंधित क्षेत्रीय कार्यालयाकडे ती तक्रार वर्ग करण्यात आली. त्यानंतर चौकशीअंती फसवणुकीचा प्रकार समोर आला. त्यानुसार फिर्याद देण्यात आली आहे. सध्या ती हातगाडी त्या ठिकाणी उभी केली जात नसल्याचे उमेश नरुले यांनी सांगितले.