म. टा. प्रतिनिधी, पुणे
कर्मचाऱ्यांच्या भविष्य निर्वाह निधीची रक्कम भरण्यास टाळाटाळ करणाऱ्या दोन कंपन्यांकडून सात कोटी रुपये वसूल करण्याची कामगिरी कर्मचारी भविष्य निधी संघटनेच्या (ईपीएफओ) आकुर्डी कार्यालयाने केली आहे. या कारवाईत गणगे प्रेसिंग कंपनीकडून तीन कोटी रुपये, तर फुजित्सु सॉफ्टवेअर कंपनीकडून ४.१ कोटी रुपये वसूल करण्यात आले आहेत, अशी माहिती आकुर्डी विभागाचे आयुक्त अमिताभ प्रकाश यांनी दिली.
या दोन्ही कंपन्यांच्या लिक्विडेटरला कर्मचाऱ्यांचा पीएफ जमा करण्याबाबत आकुर्डी कार्यालयाने वारंवार नोटीस पाठवली होती. यापैकी एक कंपनी बंद पडली असून, त्यावर नेमलेल्या लिक्विडेटरला कर्मचाऱ्यांच्या पीएफची रक्कम भरण्याची सूचना करण्यात आली होती. त्यानुसार दोन्ही कंपन्यांकडून रक्कम वसूल करण्यात आली असून, ती कर्मचाऱ्यांच्या खात्यात वर्ग करण्याची प्रक्रिया सुरू करण्यात आली आहे. कंपनीचे बँक खातेही अॅटॅच (जप्त) करण्यात आले आहे, असेही त्यांनी सांगितले.
कार्यालयातर्फे पीएफ आणि पेन्शनच्या दाव्यांचे निराकरण करण्यासाठी ९ ऑक्टोबर रोजी 'निधी आपके निकट' या लोकअदालतीचे आयोजन करण्यात आले आहे. ही लोकअदालत चाकण येथील चेंबर ऑफ कॉमर्स अँड इंडस्ट्रीजच्या कार्यालयात होणार असल्याचेही त्यांनी सांगितले.