म. टा. प्रतिनिधी, पुणे
नैर्ऋत्य मोसमी पाऊस (मान्सून) अंदमानात दाखल होण्यासाठी अनुकूल वातावरण तयार झाले असून, येत्या ४८ तासांमध्ये मान्सूनचे आगमन होण्याचे संकेत हवामान विभागाने दिले आहेत. अंदमानात दाखल झालेल्या मान्सूनची पुढील वाटचाल वेगाने होणे अपेक्षित असून, २९ मेला मान्सून केरळमध्ये पोहोचेल, असेही हवामान विभागाने स्पष्ट केले आहे.
मान्सून २३ मे पर्यंत अंदमानात दाखल होण्याची शक्यता भारतीय हवामानशास्त्र विभागाने (आयएमडी) वर्तविली होती. सर्वसाधारणपणे मान्सून २० मेपर्यंत अंदमानच्या समुद्रात दाखल होतो. यंदा त्याला काहीसा उशीर झाला असला, तरी मान्सूनच्या आगमनासाठी पोषक वातावरण तयार झाले आहे. त्यामुळे, पुढील दोन दिवसांमध्ये मान्सून अंदमानात पोहोचेल, अशी शक्यता आहे. अंदमानात मान्सून दाखल झाल्यानंतर त्याची पुढील प्रगती गतीने होण्याची शक्यता हवामान विभागाने वर्तवली आहे. त्यामुळे, केरळमध्ये मे अखेरपूर्वीच मान्सून धडकण्याची चिन्हे आहेत.
...........