म. टा. प्रतिनिधी, पुणे
सीमा शुल्क विभागाच्या अमली पदार्थ विरोधी पथकाने पाटील इस्टेट व औंध परिसरात केलेल्या कारवाईत विक्रीसाठी आणलेला २३ लाख रुपये किमतीचा १५० किलो गांजा पकडला आहे. या प्रकरणी दोघांना अटक करण्यात आली आहे. त्यासोबतच परदेशी सिगारेटच्या दोन कारवाईत मोठ्या प्रमाणात माल जप्त केला आहे.
अरुण शिवाजी भोसले (रा. सांगोला, जि. सोलापूर) आणि शिवदास बबन पवार (रा. परंडा, जि. उस्मानाबाद) अशी अटक करण्यात आलेल्या दोघांची नावे आहेत. या प्रकरणी त्यांच्यावर अमली पदार्थ विरोधी कायद्यानुसार गुन्हा दाखल करण्यात आला आहे. शहरात सीमा शुल्क विभागाने पूर्वी दोन कारवाईत मोठ्या प्रमाणात गांजा पकडला होता. यानंतर सीमा शुल्क विभागाला माहिती मिळते आणि पुणे पोलिस काय करतात, अशी चर्चा सुरू झाली होती. यानंतर वरिष्ठ अधिकाऱ्यांनी तीव्र नाराजी व्यक्त करत गुन्हे शाखेची झाडाझडती केली होती. काही दिवसांतच गुन्हे शाखेने मोठी कारवाई करत अमली पदार्थ तस्कराकडून ४८ लाखांचे कोकेन पडकले होते. शिवाजीनगर येथील पाटील इस्टेट परिसरात कारमध्ये गांजा आण्यात आला असल्याची माहिती कस्टमला मिळाली. त्यानुसार पथकाने या ठिकाणी छापा टाकला. त्या वेळी कारमधील चार पोत्यांत १०८ किलो गांजा मिळाला. या ठिकाणाहून भोसले याला पकडले. तो गांजा विक्रीसाठी आला होता. त्या वेळी औंधमधील एका रुग्णालयाजवळ कारमधध्ये गांजाची माहिती मिळाली. पथकाने या ठिकाणी छापा टाकला असता एका कारमध्ये दोन पोत्यात ५१ किलो गांजा पकडला. या दोघांकडून दोन कार व १५९ किलो गांजा असा ३६ लाख ३२ हजारांचा ऐवज जप्त केला आहे. सीमा शुल्क विभागाच्या कारवाईमुळे पुणे पोलिसांच्या अमली पदार्थ विरोधी पथकाच्या कामगिरीवर प्रश्न चिन्ह उपस्थित केले जात आहेत.
परदेशी सिगारेट पकडल्या.
सीमा शुल्क विभागाने पुणे रेल्वे स्थानकाजवळ आयात करून आणलेल्या परदेशी बनावटीच्या लाखो रुपयांच्या सिगारेट पकडण्यात आल्या आहेत. या सिगारेट नेपाळ आणि म्यानमार येथून आयात करण्यात आल्या होत्या. आंतरराष्ट्रीय बाजारात सिगरेटची किंमत ४८ लाख रुपये आहे. सहा बॉक्समध्ये या सिगारेट आणल्या गेल्या होत्या. त्याबरोबरच गोळीबार मैदानाजवळ परदेशी बनावटीच्या ७२ हजार सिगारेट एका खासगी ट्रॅव्हल्समधून पकडण्यात आल्या आहेत.