म. टा. प्रतिनिधी, पुणे
आर्थिक नफा कमविण्याच्या उद्देशानेच सर्वाधिक सायबर हल्ले केले जात आहेत. भारतात दहा सायबर गुन्ह्यांपैकी नऊमध्ये आर्थिक नफाच हेच सूत्र असल्याचे दिसून आले आहे. तसेच, क्लाउड आधारित डेटा व वेब अप्लिकेशनवर होणाऱ्या हल्ल्यात दुप्पट वाढ झाल्याचे सर्वेक्षणात समोर आले आहे. त्यामुळे घरी बसून काम करताना क्लाउड-आधारित डेटावर होणारे हल्ले, हॅकिंग आणि फिशिंगच्या सुरक्षेवर ठोस लक्ष देण्याची आवश्यकता आहे.
वेरिझॉन बिझनेस यांनी सायबर गुन्ह्यांबाबतचा अभ्यास करून 'डेटा ब्रीच इन्व्हेस्टिगेशन्स २०२०' हा अहवाल तयार केला आहे. यामध्ये ८१ देशांतील ३२ हजार सुरक्षा प्रकरणांचा अभ्यास करून हा अहवाल तयार करण्यात आला आहे. सायबर गुन्ह्यांमागे आर्थिक नफा हेच सूत्र असून, त्यामध्ये ५५ टक्के प्रकरणे संघटित गुन्हेगारीचा भाग आहेत. तसेच, सायबर गुन्हे होण्यामध्ये २२ टक्के ही मानवी चूक असल्याचे दिसून आल्याचे अहवालात म्हटले आहे.
वेब अॅप्लिकेशनवर होणाऱ्या सायबर हल्ल्यात प्रत्येक वर्षी दुपटीने वाढ झाली आहे. यामध्ये क्रेडेंशियल चोरीच्या ८० टक्क्यांहून अधिक केस नोंदवण्यात आल्या आहेत. व्यावसायिकदृष्ट्या गंभीर बाब म्हणजे अनेक प्रकारचे कामकाज क्लाउड प्रणालीवर वळविण्यात येते आहे. संपूर्ण प्रणाली ताब्यात घेऊन खंडणी उकळण्याचे (रॅन्समवेअर) प्रकारदेखील वाढले आहेत. यामध्ये २७ टक्के मालवेअर प्रकरणे सापडली आहेत. सध्या करोनाच्या उद्रेकामुळे कर्मचारी वर्ग स्वत:च्या सोयीनुसार घरातून कार्यालयाचे काम (रिमोट वर्किंग) करत आहे. अशा कर्मचाऱ्यांच्या लॅपटॉपना क्लाउडकडून सर्वांकष सुरक्षा देणे सर्वाधिक महत्त्वाचे झाले आहे, असे वेरिझॉन बिझनेसचे मुख्य कार्यकारी अधिकारी टॅमी एरविन यांनी म्हटले आहे.
फिशिंगसारखे गुन्हे अतिशय आधुनिक पद्धतीने आकस ठेवून केले जात असल्याने सायबर हल्ल्यांपासून आपल्या सिस्टीमसचा बचाव करण्यासाठी कर्मचाऱ्यांना तंत्रज्ञानविषयक शिक्षण देण्याचे आवाहन त्यांनी व्यावसायिकांना केले आहे.
....
छोटे व्यावसायिक लक्ष्य
छोटे आणि मध्यम-स्वरूपाच्या व्यवसायांचे प्रमाण वाढत आहे. हे व्यावसायिक क्लाउड आणि वेब-आधारित अॅप्लिकेशन आणि टूल्सचा वापर करत आहेत. पण, त्यांच्याकडून म्हणावी अशी सुरक्षेची खबरदारी घेतली जात नसल्यामुळे सायबर-हल्लेखोरांचे प्रमुख लक्ष्य छोटे व्यावसायिक असल्याचे दिसून आले आहे.
फिशिंगचा धोका
छोट्या व्यावसियाकांना 'फिशिंग'चा सर्वाधिक धोका आहे. तो धोका ३० टक्क्यांहून अधिक आहे. त्यानंतर क्रेडेंशियल चोरी (२७ टक्के) आणि पासवर्ड डम्पर्स (१६ टक्के) या प्रकारांचा क्रमांक लागतो. क्रेडेंशियल, वैयक्तिक डेटा आणि इतर व्यवसाय-संबंधित माहितीला हल्लेखोर लक्ष्य करत आहेत. २० टक्क्यांहून अधिक हल्ले हे वेब अॅप्लिकेशनवर होत आहेत.
...
३० टक्के
छोट्या व्यावसायिकांना
'फिशिंग'चा धोका
...
२७ टक्के
क्रेडेंशियल
चोरीचे प्रकार
...
१६ टक्के
'पासवर्ड डम्पर्स'चे प्रकार
...
२० टक्के
वेब अॅप्लिकेशनवर
हल्ल्याचे प्रकार
...