म. टा. प्रतिनिधी, पुणे
राज्य सामायिक परीक्षा कक्षाद्वारे (सीईटी सेल) विविध अभ्यासक्रमांसाठी घेण्यात येणाऱ्या प्रवेश परीक्षांसाठी नोंदणी करण्यासाठीची मुदत १५ एप्रिल आणि २० एप्रिलपर्यंत वाढविण्यात आली आहे. त्यामुळे ज्या विद्यार्थ्यांनी काही कारणास्तव नोंदणी केली नाही, अशा विद्यार्थ्यांना नोंदणी करण्याची संधी मिळणार आहे, अशी माहिती सीईटी सेलने दिली आहे.
'करोना' विषाणूला रोखण्यासाठी देशात १४ एप्रिलपर्यंत लॉकडाउन घोषित केलेले आहे. त्यामुळे सीईटी सेलकडून विविध अभ्यासक्रमांसाठी घेण्यात येणाऱ्या प्रवेश परीक्षा पुढे ढकलण्यात आल्या आहेत. ही परिस्थिती लक्षात घेऊन सीईटी सेलने बीपीएड, एमपीएड, बीएड, एमएड, बीए/बीएस्सी बीएड या अभ्यासक्रमांच्या प्रवेश परीक्षांना ऑनलाइन पद्धतीने नोंदणी करण्याची मुदत २० एप्रिलपर्यंत वाढविली आहे. इच्छुक विद्यार्थ्यांना सीईटी सेलच्या वेबसाइटवरून ऑनलाइन पद्धतीने नोंदणी करता येणार आहे, अशी माहिती सीईटी सेलने दिली आहे. त्याचप्रमाणे इंजिनीअरिंग, फार्मसी अभ्यासक्रमाच्या प्रवेशासाठी होणारी एमएचटी-सीईटी; तसेच एमसीए अभ्यासक्रमासाठी होणारी सीईटी प्रवेश परीक्षा पुढे ढकलण्यात आली असून, नवी तारीख लवकरच जाहीर करण्यात येणार आहे. दरम्यान, व्यवस्थापनाच्या एमबीए अभ्यासक्रमासाठी प्रवेश घेण्यासाठी प्रवेश परीक्षा काही आठवड्यापूर्वी पार पडली. या प्रवेश परीक्षांचा निकाल येत्या काही दिवसांत जाहीर होणार असल्याचे सीईटी सेलने सांगितले. प्रवेश परीक्षांबाबत अधिक माहिती, वेळापत्रक http://cetcell.mahacet.org/ या वेबसाइटवर उपलब्ध असून, विद्यार्थ्यांनी वेबसाइटला वेळोवेळी भेट द्यावी, असे आवाहन सीईटी सेलने केले आहे.
....
या अभ्यासक्रमांसाठी १५ एप्रिलपर्यंत मुदत
सीईटी सेलने 'हॉटेल मॅनेजमेंट अँड केटरिंग टेक्नॉलॉजी'च्या अभ्यासक्रमांना प्रवेश घेण्यासाठी होणाऱ्या बी-एचएमसीटी आणि एम-एचएमसीटी या प्रवेश परीक्षांना नोंदणी करण्याची मुदत १५ एप्रिलपर्यंत वाढवली आहे. त्याचप्रमाणे आर्किटेक्चरच्या एम-आर्च या पदव्युत्तर पदवी अभ्यासक्रमासाठी होणाऱ्या सीईटी प्रवेश परीक्षेसाठी नोंदणी करण्याची मुदत १५ एप्रिलपर्यंत वाढवली आहे, असे सीईटी सेलने स्पष्ट केले आहे.