अर्भक फेकून दिल्याप्रकरणी अज्ञात आईवडिलांविरोधात गुन्हा

म. टा. प्रतिनिधी, हडपसर

मांजरी रोड येथे रस्त्याच्या कडेला प्लास्टिकच्या पिशवीत मिळालेले स्त्री जातीचे अर्भक फेकून दिल्याप्रकरणी अज्ञात आईवडिलांविरोधात गुन्हा दाखल करण्यात आला आहे. या प्रकरणी मांजरी व हडपसर परिसरातील प्रसूतिगृहांमध्ये तपास करण्यात येत असल्याचे पोलिस निरीक्षक अंजुमन बागवान यांनी सांगितले आहे.

मांजरी रोड महादेवनगर चौरंग आंगन बिल्डिंगसमोर रविवारी सकाळी नऊ वाजण्याच्या सुमारास आकाशातून झडप घालून एक पक्षी एका प्लास्टिकच्या पिशवीतील काही तरी खात होता. त्यामुळे काही नागरिकांनी त्या पिशवीत काय आहे ते पाहिले. त्या वेळी त्यांना जखमी अवस्थेतील अर्भक आढळून आले. नागरिकांनी याबाबतची माहिती तातडीने पोलिसांना दिली. पोलिसांनी मृत अर्भकाला ससून हॉस्पिटलमध्ये नेले. ससून हॉस्पिटलच्या रिपोर्टनुसार अर्भक मृत असून, ते स्त्री जातीचे आहे. प्रसूतीच्या पूर्ण कालावधीच्या अगोदर त्याचे जन्म झाला आहे, अशी माहिती पोलिसांनी सांगितले.

दृष्टिकोन बदलण्याची गरज
केंद्र शासन व शासन वेगवेगळ्या योजनांद्वारे ‘मुलगी वाचवा, देश वाचवा’ अभियान राबवण्यात येत आहे. अनेक संस्था स्त्री सबलीकरणासाठी कार्यरत आहेत. तरीही अर्भक फेकून देण्याचे प्रकार घडत आहेत. याबाबत ‘मुलगी वाचवा अभियाना’चे डॉ. गणेश राख म्हणाले, ‘रस्त्याच्या कडेला अर्भक टाकणे हा कायद्याने गुन्हा आहे. अजूनही मुलींकडे पाहण्याचा दृष्टिकोन बदललेला नाही. त्यासाठी खूप मोठी जनजागृती होण्याची आवश्यकता आहे.’