प्रतिदिन पेट्रोलविक्री १० लाख लिटरनी, डिझेलविक्रीत २० लाख लिटरनी घटली
म. टा. प्रतिनिधी पुणे
शाळा-महाविद्यालयांना लागलेल्या सुट्ट्या, खासगी कंपन्यांतील कर्मचाऱ्यांचे 'वर्क फ्रॉम होम' आणि खबरदारीचा उपाय म्हणून घरीच थांबणारे नागरिक यांमुळे शहरातील इंधनाची दैनंदिन मागणी जवळपास तीस टक्क्यांनी घटली आहे. यापूर्वी राजकीय बंद आणि संप वगळता इंधनाच्या मागणीत एवढ्या मोठ्या प्रमाणात घट झाली नसल्याचे जाणकार सांगत आहेत.
पुणे शहर पिंपरी-चिंचवड आणि जिल्ह्यातील ग्रामीण भागांत मिळून एकूण साठ लाखांहून अधिक वाहनांची नोंद प्रादेशिक परिवहन कार्यालयात (आरटीओ) झाली आहे. या वाहनांना दैनंदिन ६० लाख लिटर डिझेल आणि ३० लाख लिटर पेट्रोलची आवश्यकता भासते. भारत पेट्रोलियम, हिंदुस्थान पेट्रोलियम आणि इंडियन ऑइल या कंपन्यांकडून पुण्यात इंधनाचा पुरवठा केला जातो. सोलापूर रस्त्यावरील लोणी येथे ऑइल कंपनीचा डेपो आहे. तेथून जिल्ह्यातील पेट्रोल पंपांना इंधनाचा पुरवठा होतो. संपूर्ण जिल्ह्यात इंधनाच्या मागणीतही मोठी घट नोंदविण्यात आली आहे. पेट्रोलची मागणी दहा लाख लिटरनी आणि डिझेलची मागणी वीस लाख लिटरने घटली आहे, अशी माहिती 'ऑल इंडिया पेट्रोल डीलर असोसिएशन'चे राष्ट्रीय प्रवक्ते अली दारूवाला यांनी दिली. दरम्यान, पेट्रोल पंप बंद ठेवण्याच्या शक्यतेने अनेकांनी यापूर्वीच गाड्यांच्या टाक्या भरून घेतल्याचे काही पंपांवरील कर्मचाऱ्यांनी सांगितले.
...
स्कूल बस, खासगी बस बंदचा परिणाम
गेल्या आठवडाभरापासून शाळा आणि कॉलेजांना सुट्टी जाहीर करण्यात आली आहे. बहुतांश खासगी कंपनीतील कर्मचाऱ्यांना घरबसल्या काम करण्याची मुभा देण्यात आली आहे. त्यामुळे या घटकांकडून होणारी इंधनाची मागणी घटली आहे.
................
'सीएनजी' मागणीतही घट
पुणे आणि पिंपरी चिंचवड शहरात गेल्या काही वर्षांत 'सीएनजी' वरील वाहनांची संख्या वाढली आहे. रिक्षा आणि पीएमपी बसही सीएनजीवर चालविल्या जात आहेत. त्यामुळे दिवसाला साडेचार लाख किलो 'सीएनजी'ची विक्री होते. सध्या 'करोना'मुळे वाहनांची वर्दळ कमी झाली असून, 'सीएनजी'च्या मागणीत प्रतिदिन एक लाख किलोने घट झाली आहे, अशी माहिती 'महाराष्ट्र नॅचरल गॅस लिमिटेड'चे वाणिज्य संचालक संतोष सोनटक्के यांनी दिली.
...
सध्याच्या परिस्थितीमुळे इंधनाच्या मागणीत घट झाली आहे. मात्र, आपल्याकडील परिस्थिती पाहता येत्या आठवडाभरात त्यात सुधारणा अपेक्षित असून मागणी पुन्हा पूर्ववत होईल, असे दिसते.
अली दारूवाला, राष्ट्रीय प्रवक्ते, ऑल इंडिया पेट्रोल डीलर असोसिएशन
................
३० लाख लिटर
पेट्रोलची दैनंदिन मागणी
....
६० लाख लिटर
डिझेलची दैनंदिन मागणी
....
२० लाख लिटर
सध्याची पेट्रोलची मागणी
....
४० लाख लिटर
सध्याची डिझेलची मागणी