म. टा. प्रतिनिधी, पुणे
सिंहगड टेक्निकल एज्युकेशल सोसायटीच्या महाविद्यालयांतील अनुभवी प्राध्यापकांना कामावरून काढून टाकणे, प्राध्यापकांचे निलंबन करणे, बदली करणे असे प्रकार सुरू आहेत, तर काही प्राध्यापक आणि शिक्षकेतर कर्मचाऱ्यांचे प्रश्न अजूनही सुटलेले नाही. याबाबत राज्य सरकारने अद्याप ठोस भूमिका घेतलेली नाही. त्यामुळे न्यायालयात कायदेशीर प्रक्रिया सुरू आहे. प्राध्यापक-कर्मचाऱ्यांचे प्रश्न सुटावेत, यासाठी आणि संस्थेचा मनमानी कारभार रोखण्यासाठी सोसायटीवर प्रशासक नेमण्याचा ठोस निर्णय व्हावा, अशी मागणी सिंहगड समन्वय समितीने केली आहे.
प्राध्यापक आणि कर्मचाऱ्यांना नोकरीवरून काढण्याची भीती असल्याने ते सोसायटीच्या विरोधात बोलत नाही. सोसायटीच्या कॉलेजांमध्ये काम करणारे प्राध्यापक-कर्मचारी आणि त्यांचे कुटुंबीय असे सुमारे एक लाख मतदार कोथरूड, खडकवासला, पुरंदर, मावळ, सोलापूर, सांगोला आणि पंढरपूर या मतदारसंघात आहे. त्यामुळे सत्ताधाऱ्यांकडून प्रश्न सुटण्याचे ठोस आश्वासन न मिळाल्यास मतदानावर बहिष्कार टाकण्याचा मार्गही निवडला जाऊ शकतो, असे समितीने स्पष्ट केले आहे.