म. टा. प्रतिनिधी, पुणे
झील एज्युकेशन सोसायटीने केलेले अनधिकृत बांधकाम नोटीस मिळाल्याच्या चोवीस तासात पाडावे, असे आदेश पुणे महानगर प्रदेश विकास प्राधिकरणाने (पीएमआरडीए) नोटीशीद्वारे सोसायटीच्या प्रशासनाला पाठविले आहेत. सोसायटीने बांधलेल्या दहा इमारंतींपैकी एक इमारत ही पूर्णपणे अनधिकृत असून, उरलेल्या नऊ इमारतींमध्ये सरासरी दोन ते तीन मजले अनधिकृत असल्याचे आरोप योगेश ढगे आणि सहकाऱ्यांनी मंगळवारी पत्रकार परिषदेत केला. दरम्यान, सोसायटीचे कार्यकारी संचालक जयेश काटकर यांनी पीएमआरडीएकडून कोणतेही पत्र मिळाले नसल्याचे सांगितले.
पीएमआरडीने सोसायटीला पाठवलेल्या नोटीसमध्ये अनधिकृत बांधकामाची माहिती दिली आहे. सोसायटीने बांधकाम न पाडल्यास ते पीएमआरडीएकडून पाडण्यात येईल तसेच; बांधकामासाठी होणारा खर्च सोसायटीकडून वसूल करण्यात येईल, असे नोटीशीत म्हटले आहे. सोसायटीच्या नऱ्हे शैक्षणिक संकुलात एकूण १० इमारती असून, त्यापैकी एक इमारत ही पूर्णपणे अनधिकृत आहे. याशिवाय उर्वरित नऊ इमारतींमध्ये सरासरी दोन ते तीन मजले अनधिकृत आहेत. या संकुलात २ लाख ३० हजार चौरस फूट बांधकाम अनधिकृत असून, पीएमआरडीएत तडजोड शुल्क किंवा दंड भरून नियमित होऊ शकत नाही. त्यामुळे पीएमआरडीएने १२ डिसेंबरला नोटीशीद्वारे सोसायटीला अनधिकृत बांधकाम पाडण्याचे आदेश दिले आहेत. या अनधिकृत बांधकामाचा खर्च, त्यावरील घसारा, दुरुस्ती देखभाल खर्च, इमारतीवर घेतलेल्या कर्जाचे व्याज आदी इमारतीचे खर्च शिक्षणशुल्क नियामक प्राधिकरणास दाखवून खर्चात वाढ केली. या वाढीव खर्चाच्या आधारे कॉलेजांचे शुल्क २००९-१० सालापासून वाढवून घेतले. याचा आर्थिक भुर्दंड विद्यार्थी-पालकांना बसला. या अनधिकृत बांधकामाची नोंद फक्त ग्रामपंचायतीमध्ये केला. सोसायटीने अखिल भारतीय तंत्रशिक्षण परिषद (एआयसीटीई), तंत्रशिक्षण संचालनालय (डीटीई), महाराष्ट्र राज्य तंत्रशिक्षण मंडळ (एमएसबीटीई) आणि सावित्रीबाई फुले पुणे विद्यापीठ यांना थोटी माहिती देऊन फसवणूक केल्याचा आरोप ढगे यांनी केला.
...
पीएमआरडीएच्या आदेशाचे कोणतेही पत्र सोसायटीला अद्याप मिळालेले नाही. पत्र मिळाल्यावर त्याबाबत आम्ही पीएमआरडीए प्रशासनाशी चर्चा करू. अनधिकृत बांधकाम नियमित करण्याबाबत आम्ही पीएमआरडीएला २०१७मध्ये प्रस्ताव दिला आहे. त्यावर पीएमआरडीने काय निर्णय घेतला, याची अद्याप माहिती नाही. बुधवारी दुपारी पीएमआरडीएच्या कार्यालयात जाऊन या प्रकाराबाबत अधिकाऱ्यांशी चर्चा करू. त्यानंतर प्रकाराबाबत अधिक माहिती देता येईल.
- जयेश काटकर, कार्यकारी संचालक, झील एज्युकेशन सोसायटी