‘डेमू’सह लोकल रद्द

आजपासून दौंड मार्गावर मेगाब्लॉक घेणार

म. टा. प्रतिनिधी, पुणे

रेल्वेच्या पुणे विभागात पुणे-लोणावळा मार्गावर उद्या, रविवारी दुपारी तीन तासांचा मेगाब्लॉक घेतला जाणार आहे. त्यामुळे लोकलच्या सहा फेऱ्या रद्द करण्यात आल्या आहेत. दौंड मार्गावर ट्रॅकच्या दुरुस्तीसाठी आज, शनिवारपासून ३० नोव्हेंबरपर्यंत दररोज तीन तासांचा मेगाब्लॉक घेण्यात येणार आहे. त्यामुळे या मार्गावरील डेमूसह काही गाड्या रद्द करण्यात आल्या आहेत, तर काहींच्या वेळापत्रकात बदल करण्यात आला आहे.
पुणे रेल्वे स्टेशन येथून दुपारी सव्वाबारा, एक आणि तीन वाजता लोणावळ्यासाठी रवाना होणारी गाडी रद्द केली आहे. लोणावळ्याहून सकाळी साडेअकरा, दुपारी दोन आणि तळेगाव येथून सायंकाळी चार वाजून ३८ मिनिटांनी सुटणारी गाडी रद्द करण्यात आली आहे. यामुळे पुण्यातून दुपारी तीन वाजून ४० मिनिटांनी सुटणारी लोकल तळेगावऐवजी लोणावळ्यापर्यंत धावणार आहे.
दौंड मार्गावर पुणे स्टेशनवरून सकाळी साडेदहा वाजता सुटणारी पुणे-दौंड डेमू आणि दौंडवरून दुपारी १२ वाजून ४३ मिनिटांनी सुटणारी डेमू रद्द केल्या आहेत. बारामती-पुणे पॅसेंजर, पुणे-निझामाबाद पॅसेंजर या गाड्या पुणे-दौंड व दौंड-पुणे दरम्यान अल्प कालावधीसाठी रद्द करण्यात आल्या आहेत. अमरावती-पुणे एक्सप्रेस रविवारी दौंड रेल्वे स्टेशनवर ५० मिनिटे थांबविली जाणार आहे. या बदलाची प्रवाशांनी दखल घेऊन रेल्वे प्रशासनाला सहकार्य करावे असे आवाहन करण्यात आले आहे.