पुणे-सातारा मार्गावर लोकल?

‘डेमू’ची चाचणी यशस्वी
म. टा. प्रतिनिधी, पुणे
पुणे आणि सातारा या दोन शहरांना रेल्वेच्या लोकल सेवेने जोडण्यासाठी मध्य रेल्वेच्या पुणे विभागाने पावले उचलली आहेत. दोन दिवसांपूर्वी पुणे ते सातारा या मार्गावर ‘डेमू’ची (डिझेल मल्टिपल युनिट) यशस्वी चाचणी घेण्यात आली आहे.
रेल्वे बोर्डाकडून पुणे विभागासाठी दोन ‘डेमू’ दाखल झाल्या आहेत. तसेच, आणखी ‘डेमू’ दाखल होण्याची शक्यता आहे. रेल्वे प्रशासनाने यापूर्वी पुणे-दौंड मार्गावर दोन वेळा यशस्वी चाचणी घेतली आहे. त्यानंतर आता सातारा मार्गावरही यशस्वी चाचणी झाली. त्यामुळे या मार्गावरही लोकल (उपनगरीय सेवा) सेवा सुरू होण्याच्या आशा पल्लवीत झाल्या आहेत. पुणे स्टेशनवरून ‘डेमू’ सकाळी आठ वाजून ५० मिनिटांनी साताऱ्यासाठी रवाना झाली. ती १२ वाजून ५५ मिनिटांनी सातारा स्टेशनला पोहोचली. तेथून पुन्हा एक वाजून ५१ मिनिटांनी पुण्यासाठी रवाना होऊन सव्वासहा वाजता पुणे स्टेशनला दाखल झाली.
पुणे-सातारा मार्गावर वाठार, आदरकी, नीरा, लोणंद, वाल्हे, जेजुरी, सासवड रोड आदी मुख्य स्टेशन आहेत. साताऱ्यासह या अन्य ठिकाणांवरून विविध कारणांनी पुण्यात येणाऱ्यांची संख्या प्रचंड आहे. मात्र, सध्या त्यांच्याकडून रस्ते वाहतुकीचा अवलंब केला जातो. त्यामुळे नागरिकांना वाहतुकीचा स्वस्त व सुलभ पर्याय म्हणून लोकल सेवेला पसंती मिळू शकते. माधवराव शिंदे रेल्वे मंत्री असताना ऐंशीच्या दशकात त्यांनी पुणे विभागात भेट दिली होती. त्या वेळी त्यांनी पुणे-दौंड, पुणे-सातारा, पुणे-मनमाड मार्गावर शटल सेवा सुरू करण्याचे आश्वासन दिले होते. त्यानंतर पहिल्यांदाच या मार्गावर उपनगरीय सेवेसाठी प्रयत्न करण्यात आले आहेत.
सध्या कोल्हापूरवरून सुटणाऱ्या आणि पुणेमार्गे पुढे जाणाऱ्या सह्याद्री एक्स्प्रेस, कोयना एक्स्प्रेस, महालक्ष्मी एक्स्प्रेस, महाराष्ट्र एक्स्प्रेस या गाड्यांद्वारे प्रवासी दिली जाते. मात्र, या गाड्या सातारा स्टेशनवरून सुटल्यानंतर थेट पुणे स्टेशनला थांबतात. त्यामुळे वाठार, आदरकी, निरा, लोणंद, वाल्हे, जेजुरी, सासवड या ठिकाणच्या प्रवाशांना रेल्वे सेवेचा लाभ घेता येत नाही.
..............
पॅसेंजर गैरसोयीची
सध्या सातारा-पुणे ही एक पॅसेंजर कार्यान्वित आहे. ती पहाटे सव्वाचार वाजता साताऱ्याहून सुटते. ती सकाळी आठ वाजून ४० मिनिटांनी पुणे स्टेशनला दाखल होते. तिच गाडी पुणे स्टेशनवरून सायंकाळी पाच वाजून १० मिनिटांनी सूटते, ती रात्री साडेदहा वाजता साताऱ्याला पोहोचते. मात्र, या गाडीच्या साताऱ्यावरून येण्याची वेळ प्रवाशांसाठी सोयीस्कर नाही. त्यामुळे ही पॅसेंजर प्रवाशांच्या दृष्टीने फायद्याची ठरत नाही, अशी माहिती रेल्वे प्रवासी ग्रुपच्या अध्यक्ष हर्षा शहा यांनी दिली.