तेराशे जणांना नोटिसा; दंडात्मक कारवाईवर भर
म. टा. प्रतिनिधी, पुणे
पावसाने घेतलेली विश्रांती, दिवसा उकाडा, अधूनपडून पडणाऱ्या सरी आणि रात्री गारवा अशा संमिश्र वातावरणामुळे शहरात डेंगीच्या विषाणूजन्य तापाचा संसर्ग वाढू लागला आहे. परिणामी, घरटी विषाणूजन्य तापासह डेंगीची लक्षणे असणारा किमान एक रुग्ण आढळून येत आहे. त्यामुळे १३०० जणांना नोटिसा देण्यात आल्या असून, २० हजार रुपयांचा दंड वसूल करण्यात आला आहे.
शहरात गेल्या दोन महिन्यांत डेंगीच्या रुग्णांचे प्रमाण वाढले आहे. जून महिन्यात पाऊस झाल्यानंतर रुग्णांची संख्या वाढली आहे. जुलैमध्ये मोठ्या प्रमाणात पाऊस झाला. त्यानंतर ऑगस्टमध्येही पाऊस झाला. मात्र, गेल्या काही दिवसांपासून पावसाने विश्रांती घेतली आहे. त्यामुळे डेंगीच्या विषाणूंच्या वाढीसाठी पोषक वातावरण निर्माण झाले. ऑगस्ट महिन्यात आतापर्यंत ७५० जणांना डेंगीच्या डासाने चावा घेतला आहे. पैकी १९६ जणांची डेंगीची चाचणी पॉझिटिव्ह आली आहे, अशी माहिती पालिकेच्या आरोग्य विभागाने दिली. डासांच्या चावण्यामुळे डेंगीच्या रुग्णांच्या संख्येत गेल्या काही दिवसांत वाढ होत आहे. डेंगीची लक्षणे दिसून येत असल्याने अनेक भागांतील रुग्णालयांमध्ये रुग्णांची गर्दी दिसत आहे.
'शहरात आतापर्यंत विविध ठिकाणी डासाच्या अळ्या सापडल्या असून, डासांची निर्मितीची ठिकाणेही वाढली आहेत. त्यामुळे डेंगीच्या रुग्णांची वाढली आहे. दरवर्षीप्रमाणे यंदाही पावसाच्या विश्रांतीनंतर डेंगीचे रुग्ण वाढत आहेत. मुंबई महापालिकेच्या धर्तीवर शहरात कीटक सर्व्हेक्षण कऱण्यात सुरू करण्यात आले आहे. त्यामुळे सध्या शहरात विविध ठिकाणी डेंगीचे डास आढळले असून, आतापर्यंत १२०० ते १३०० ठिकाणी डास आढळल्याने नोटिसा देण्यात आल्या आहेत. त्यामध्ये सोसायट्यांपासून बांधकाम व्यावसायिकांचा समावेश आहे. सुरुवातीला डास, अळ्या सापडल्यास त्या वेळी 'ड्राय डे' पाळण्याच्या सूचना देण्यात आल्या होत्या. आतापर्यंत शहरात २० हजार रुपयांचा दंड वसूल करण्यात आला आहे,' अशी माहिती पालिकेच्या आरोग्य विभागाचे आरोग्य प्रमुख डॉ. रामचंद्र हंकारे यांनी दिली.
शहरात डेंगीचे डास आढळत असल्याने धूरफवारणी, औषध फवारणी हाती घेण्यात आली आहे. डेंगीचे रुग्ण आढळत असल्याने सरकारी तसेच खासगी रुग्णालयांना सूचना देण्यात आल्या आहेत, असेही डॉ. हंकारे यांनी सांगितले.
...
शहरातील डेंगीचे रुग्ण
महिना संख्या
जानेवारी ८६
फेब्रुवारी ३६
मार्च ३७
एप्रिल ३१
मे १९
जून १६८
जुलै ४६७
ऑगस्ट ७५०
....
लहान मुलांमध्ये डेंगीचा ताप तसेच साधा ताप आणि स्वाइन फ्लूचा ताप असे तीनही प्रकारचे ताप आढळत आहेत. या शिवाय हॅन्डफूट माउथच्या आजाराचीही लक्षणे दिसून येत आहेत. बदलत्या हवामानाचे हे परिणाम आहेत. तापाच्या रुग्णांमध्येही वाढ झाली आहे.
डॉ. तुषार पारीख, बालरोग तज्ज्ञ, मदरहूड रुग्णालय