विनयभंगप्रकरणी डॉक्टरवर गुन्हा

हडपसर : माझ्या दवाखान्यात कामाला ये, त्या डॉक्टरपेक्षा दुप्पट पगार तुला देतो, तसेच सर्व सुविधा पुरवतो, असे बोलून हात पकडणाऱ्या डेंटिस्टविरोधात २४ वर्षीय तरुणीने हडपसर पोलिस ठाण्यात तक्रार दिली आहे. त्यावरून संबंधित डेंटिस्टविरोधात विनयभंग, तसेच दमगाटी केल्याचा गुन्हा दाखल करण्यात आला आहे.

डॉ. ओंकार प्रकाश हरिदास (वय ३२, रा. हांडेवाडी रोड, सातवनगर, हडपसर) असे आरोपीचे नाव आहे. हडपसर पोलिस ठाण्याचे वरिष्ठ पोलिस निरीक्षक विष्णू पवार यांनी दिलेल्या माहितीनुसार, पीडित तरुणी हडपसर येथील एका डॉक्टरकडे तीन वर्षांपासून सहायक म्हणून नोकरी करीत होती. डॉ. ओंकार याने या तरुणीला मोबाइलवरून हडपसर येथील आस्था डेंटल क्लिनिक येथे बोलावून घेतले. ‘मी तुला दुप्पट पगार देऊन सर्व सुविधा पुरवेल,’ असे म्हणून संबंधित डॉक्टरने तरुणीचा विनयभंग केला, तसेच मारून टाकेन, अशी धमकी दिल्याचे तक्रारीत म्हटले आहे.