​ ‘आरटीई’साठी विशेष वर्ग

‘डीईएस’च्या दोन शाळांचा उन्हाळ्याच्या सुट्टीत उपक्रम

Harsh.Dudhe@timesgroup.com
Tweet : @HarshDudheMT

पुणे : पुणे शहरातील खासगी इंग्रजी माध्यमांच्या शाळांमध्ये शिक्षणहक्क कायद्यांतर्गत विद्यार्थ्यांना प्रवेश देण्यासाठी टाळाटाळ केली जात आहे. तर, काही ठिकाणी विद्यार्थ्यांकडे मुद्दाम लक्ष दिले जात नाही. अशा परिस्थितीत डेक्कन एज्युकेशन सोसायटीच्या मातृमंदिर संस्कार केंद्र आणि डीईएस प्री प्रायमरी स्कूलमध्ये या विद्यार्थ्यांची विशेष काळजी घेतली जात आहे. त्यासोबतच अभ्यासात कमकुवत असणाऱ्या विद्यार्थ्यांसाठी उन्हाळ्याच्या सुट्टीत विशेष वर्गांचे आयोजन करण्यात आले आहे. त्यामुळे आरटीईद्वारे प्रवेशित विद्यार्थी आणि सामान्य विद्यार्थी यांच्यातील फरक कमी होण्याची शक्यता आहे.
राज्यात आरटीई कायदा सहा वर्षांपूर्वी लागू झाला. या कायद्यांतर्गत समाजातील आर्थिक दुर्बल घटकांतील मुलांना शाळेच्या एंट्री पॉइंटनुसार २५ टक्के राखीव जागांवर मोफत प्रवेश देण्यात येतो. मात्र, बहुतेक शाळा या आरटीई प्रवेश प्रक्रियेद्वारे मुलांना प्रवेश देण्यासाठी टाळाटाळ करतात. तसेच, शाळेमध्ये प्रवेश घेतलेल्या विद्यार्थ्यांना दुय्यम वागणूक दिल्या जाते. तसेच, काही शाळांमध्ये शिक्षक या विद्यार्थ्यांकडे जाणीवपूर्वक दुर्लक्ष करतात आणि विद्यार्थ्यांना योग्यप्रकारे मार्गदर्शन करत नाहीत, अशी पालकांची तक्रार असते.
अशा परिस्थितीत डेक्कन एज्युकेशन सोसायटीच्या दोन्ही शाळांमधून नर्सरीमध्ये आरटीईद्वारे प्रवेश मिळालेल्या तसेच अभ्यासात मागे असणाऱ्या विद्यार्थ्यांसाठी विशेष वर्गांचे आयोजन करण्यात आले आहे. वर्गांसाठी विविध माध्यमांचा वापर करण्यात येत आहेत. विद्यार्थ्यांची वाचन, लेखन आणि विविध गोष्टी समजण्याची क्षमता वाढण्यासाठी बिट्स अँड वायर, चर्निंग वॉटर, ब्लॉक बिल्डिंग, पझल्सचा वापर करण्यात येत आहे. या विद्यार्थ्यांच्या बोटांच्या स्नायूंचा व्यायाम होण्यासाठी आणि त्यांचा लिहिण्याचा वेग वाढविण्यासाठी त्यांना मैदा भिजवण्याचे प्रात्यक्षिक आदी नावीन्यपूर्ण प्रयोग करायला देतात. या सर्वांमुळे विद्यार्थ्यांची आकलनक्षमता वाढण्यासाठी मदत होत आहे. त्यातच पुन्हा शिक्षिका जातीने विद्यार्थ्यांची काळजी घेत आहेत, असे केंद्राच्या संचालक माधुरी बर्वे यांनी सांगितले.
दरम्यान, गेल्या तीन वर्षांपासून आरटीई प्रवेश प्रक्रिया रेंगाळत आहे. त्यामुळे प्रवेश प्रक्रियेतून विद्यार्थ्यांना प्रवेश घेण्यासाठी उशीर झाला. काही विद्यार्थ्यांचा प्रवेश शाळा सुरू झाल्यानंतर काही महिन्यांनी झाला. त्यामुळे विद्यार्थ्यांचे काही प्रमाणात शैक्षणिक नुकसान झाले. त्यामुळे या विद्यार्थ्यांचे नुकसान विशेष वर्ग घेऊन भरून काढण्यात आले.

यंदा आरटीईद्वारे प्रवेश मिळालेल्या विद्यार्थ्यांसाठी नियमित वर्गांव्यतिरिक्त शनिवारी विशेष वर्गांचे आयोजन करण्यात येईल. वर्गांमध्ये या विद्यार्थ्यांसोबत सामान्य प्रवेश प्रक्रियेद्वारे प्रवेश मिळालेले मात्र, अभ्यासात कमकुवत असणारे विद्यार्थी उपस्थित राहणार आहेत. त्यामुळे या वर्गांचा फायदा दोन्ही विद्यार्थ्याना होईल.
माधुरी बर्वे, केंद्र संचालक

प्रत्येकाला समान शिक्षणाची संधी मिळाली पाहिजे. प्रत्येक विद्यार्थ्याला त्याच्या कुटुंबातून योग्य शैक्षणिक पोषण मिळते, असे नाही. हे पोषण आरटीई प्रवेशित आणि सामान्य विद्यार्थ्यांना विशेष वर्गातून देण्याचा प्रयत्न आम्ही करीत आहोत.
किरण शाळिग्राम, सदस्य, नियामक मंडळ, डेक्कन एज्युकेशन सोसायटी