संमेलनाध्यक्षांचे भाषण डाउनलोडिंगसाठी उपलब्ध

म. टा. प्रतिनिधी, पुणे

बडोदा येथे झालेल्या ९१ व्या अखिल भारतीय मराठी साहित्य संमेलनाचे अध्यक्ष लक्ष्मीकांत देशमुख यांचे अध्यक्षीय भाषण महाराष्ट्र साहित्य परिषदेच्या www.masapapune.org या संकेतस्थळावर उपलब्ध करून देण्यात आले आहे. ते साहित्यप्रेमींना विनामूल्य डाउनलोड करून घेता येईल, अशी माहिती परिषदेचे कार्याध्यक्ष प्रा. मिलिंद जोशी यांनी दिली. 'राजा तू चुकत आहेस, तू सुधारले पाहिजे,' अशा आशयाचे देशमुख यांचे भाषण साहित्य वर्तुळासह सर्वत्र चर्चेचा विषय ठरले आहे. या पार्श्वभूमीवर हे भाषण सर्वांना उपलब्ध झाले आहे.

शंभूराजे पुरस्कार प्रदान

शिवस्फूर्ती प्रतिष्ठानतर्फे 'शिवपुत्र छत्रपती शंभूराजे पुरस्कार' इतिहासतज्ज्ञ प्रा. मा. म. देशमुख यांना ज्येष्ठ नेते डॉ. बाबा आढाव यांच्या हस्ते प्रदान करण्यात आला. सुनीता पाटील यांना 'महाराणी ताराराणी पुरस्कार' देण्यात आला. 'शिवस्पर्श पुरोगामी विचार' शिवजयंती विशेषांकाचे प्रकाशन करण्यात आले. प्रवीण गायकवाड, राहुल पोकळे व ज्ञानेश्वर मोळक यांचा सन्मान करण्यात आला. देशमुख म्हणाले, 'शिक्षणाने जातिव्यवस्था नष्ट करता येते. त्यामुळे बहुजनांनी शिक्षणाचे महत्त्व ओळखले पाहिजे. तरुणांनी महापुरुषांचे विचार स्वीकारून विचारनिष्ठ झाले पाहिजे. असंघटित समाज हा बळी जाणारा समाज आहे. त्यांना संघटित केले पाहिजे. अॅड. शैलजा मोळक यांनी प्रास्ताविक केले. प्रज्ञेश मोळक यांनी सूत्रसंचालन केले. कैलास वडघुले यांनी आभार मानले.

संस्कृत स्पर्धेत 'सप' प्रथम

फर्ग्युसन महाविद्यालय आयोजित रा. ना. दांडेकर संस्कृत राज्यस्तरीय एकांकिका स्पर्धेत स. प. महाविद्यालयाने प्रथम क्रमांक पटकावला. याशिवाय अभिनय प्रथम- आकांक्षा ब्रह्मे व दर्शन वझे, दिग्दर्शन प्रथम - सुधर्म दामले अशी तीन वैयक्तिक पारितोषिकेही विद्यार्थ्यांनी प्राप्त केली. 'संगीत जय जय गौरीशंकर' या विद्याधर गोखले यांच्या मूळ नाटकाचा संस्कृत अनुवाद व रंगावृत्ती संस्कृत विभागाने सादर केली व यासाठी विद्याधर गोखले यांच्या कन्या शुभदा दादरकर यांचे सहकार्य आणि महाविद्यालयाच्या संस्कृत विभागाच्या डॉ. भारती बालटे यांचे मार्गदर्शन मिळाले. स. प. महाविद्यालयाचे प्राचार्य डॉ. दिलीप शेठ, उपप्राचार्य डॉ. अशोक चासकर, उपसंचालक मोहन राठोड, जिल्हा माहिती अधिकारी राजेंद्र सरग यांच्या उपस्थितीत पारितोषिक वितरण झाले.