म. टा. प्रतिनिधी, पुणे
सहकारनगर व बिबवेवाडी परिसरात घरफोडी करणाऱ्या चार चोरट्यांना कोंढवा पोलिसांनी पकडले आहे. त्याच्याकडून घरफोडीचे तीन गुन्हे उघडकीस आणत पावणेदोन लाखांचा ऐवज जप्त करण्यात आला आहे.
बग्गा उर्फ जुबेर रफिक शेख (वय २०), छप्पन उर्फ मोहसीन अन्वर शेख (२५), साहिल समीर कुरेशी (२१), नाजीम आयुब खान (२४) सर्व रा. कोंढवा) अशी अटक करण्यात आलेल्यांची नावे आहेत. त्यांच्याबरोबर घरफोडीचे गुन्हे करणाऱ्या एका अल्पवयीन मुलांना ताब्यात घेण्यात आले आहे. शेख, कुरेशी, खान यांनी बिबवेवाडी, सहकारनगर, कोंढवा भागात घरफोडीचे गुन्हे केल्याची माहिती कोंढवा पोलिसांना मिळाली होती. त्यानुसार वरिष्ठ निरीक्षक मिलिंद गायकवाड, निरीक्षक महादेव कुंभार यांच्या पथकाने सापळा लावून ताब्यात घेतले. चोरट्यांनी गुन्हा करण्यासाठी वापरलेली रिक्षा आणि ऐवज जप्त करण्यात आला आहे. त्यांच्याकडून आणखी काही गुन्हे उघडकीस येण्याची शक्यता आहे.
इंस्टेट एजंटची फसवणूक
म. टा. प्रतिनिधी, पुणे
स्वस्तात अमेरिकन डॉलर देण्याच्या आमिषाने एका इस्टेट एजंटची ९० हजार रुपयांची फसवणूक केल्याचा प्रकार समोर आला आहे. या प्रकरणी हडपसर पोलिसांनी चौघांच्या विरोधात गुन्हा दाखल करण्यात आला आहे.
याबाबत मुक्तार खान (वय ४०, रा. थिटे वस्ती, खराडी) यांनी तक्रार दिली आहे. पोलिसांनी दिलेल्या माहितीनुसार, खान यांचा जमीन खरेदी- विक्री करण्याचा व्यवसाय आहे. काही दिवसांपूर्वी एकाने त्यांच्या मोबाइल क्रमांकावर संपर्क साधला. हडपसर भागातील एका जमिनीची विक्री करायची आहे, असे खान यांना सांगितले. गेल्या महिन्यात खान हडपसर भागात गेले. त्या वेळी आरोपीने त्यांच्या मोबाइल क्रमांकावर संपर्क साधून एका मोकळ्या जागेत बोलाविले. आरोपींनी जागा विक्री करायची बतावणी केली. त्यानंतर आरोपींनी आम्हाला अमेरिकन डॉलर सापडले आहेत, असे सांगितले. खान यांना डॉलर दाखविले. दीड लाखांत डॉलरचे बंडल देतो, असे आमिष त्यांना दाखविण्यात आले. त्यानंतर खान यांनी ९० हजारांत डॉलर खरेदी करण्याबाबत तडजोड केली. आरोपींना ते हडपसर भागात भेटले. त्यानंतर आरोपींनी त्यांना कागदाचा गठ्ठा दिला. त्यात डॉलर ठेवल्याची बतावणी त्यांच्याकडे केली. त्यानंतर खान यांना कागदाची गुंडाळी देऊन त्यांच्याकडून ९० हजार रुपये घेतले. चौघे आरोपी तेथून पसार झाले. कागदाची गठ्ठा उघडून बघितल्यानंतर त्यात डॉलर नसल्याचे उघडकीस आले. खान यांनी पोलिसांकडे तक्रार दिली. त्यानुसार उपनिरीक्षक मंगेश भांगे तपास करत आहेत.
ट्रॅक्टरच्या धडकेत नागरिकाचा मृत्यू
म. टा. प्रतिनिधी, पुणे
रस्त्यावर गप्पा मारत उभ्या असलेल्या व्यक्तीला ट्रॅक्टरची धडक बसून झालेल्या अपघातात त्यांचा मृत्यू झाला. लोहगाव येथील ऑर्चिड सोसायटीसमोर रविवारी सायंकाळी हा अपघात झाला. या प्रकरणी ट्रॅक्टर चालकावर गुन्हा दाखल करण्यात आला आहे.
रोहित कुमार (वय ३२, रा. धानोरी) असे मृत्यू झालेल्या व्यक्तीचे नाव आहे. रोहितकुमार हे रविवारी सायंकाळी लोहगाव येथील ऑर्चिड सोसायटीसमोरील रस्त्यावर मित्रासोबत गप्पा मारत उभे होते. त्या वेळी अज्ञात ट्रक चालकाने रोहितकुमार यांना जोराची धडक दिली. यात त्यांचा मृत्यू झाला. अपघातानंतर ट्रॅक्टर चालक पळून गेला आहे. या प्रकरणी विमानतळ पोलिस ठाण्यात गुन्हा दाखल करण्यात आला आहे. या प्रकरणी उपनिरीक्षक डी. जे. जाधव अधिक तपास करत आहेत.