जेजुरी तीर्थक्षेत्राबाबत जिल्हाधिकारी नवल किशोर राम यांची माहिती
म टा. प्रतिनिधी, पुणे
'जेजुरी तीर्थक्षेत्राचा कायापालट करण्यासाठी जेजुरी तीर्थक्षेत्र विकास आराखडा करण्यात येणार आहे. त्यासाठी येत्या दोन महिन्यांमध्ये सर्वेक्षण केले जाणार आहे,' असे जिल्हाधिकारी नवल किशोर राम यांनी सांगितले.
जिल्ह्यातील प्रमुख तीर्थक्षेत्रांचा विकास करण्याचे काम हाती घेण्यात आले आहे. त्यामध्ये आळंदी, भीमाशंकर आणि निरा नरसिंहपूर या तीर्थक्षेत्रांचा समावेश आहे. त्या धर्तीवर आता जेजुरी तीर्थक्षेत्राचादेखील विकास केला जाणार आहे.
बारामती लोकसभा मतदारसंघातील विकासकामांचा आढावा घेण्यासाठी खासदार सुप्रिया सुळे यांच्या उपस्थितीत बैठकीचे आयोजन करण्यात आले होते. त्या वेळी जेजुरी तीर्थक्षेत्राच्या विकासाबाबत प्रश्न उपस्थित करण्यात आला. त्या वेळी जिल्हाधिकारी यांनी ही माहिती दिली.
'जेजुरी तीर्थक्षेत्राचा विकास करण्याची चर्चा गेल्या अनेक दिवसांपासून सुरू आहे. मात्र, प्रत्यक्षात कार्यवाही होत नसल्याची बाब निदर्शनास आणून देण्यात आली. विकास आराखडा तयार करताना देवस्थानच्या विश्वासांना विश्वासात घ्यावे, अशी मागणी विश्वस्तांच्या वतीने बैठकीत करण्यात आली. त्यावेळी जिल्हाधिकारी राम यांनी विश्वस्तांशी चर्चा करूनच विकास आराखडा बनवण्यात येणार आहे,' असे स्पष्ट केले.
ते म्हणाले, 'या तीर्थक्षेत्राचा विकास करण्यासाठी तयार करण्यात येणाऱ्या आराखड्याच्या सर्वेक्षणाचे काम येत्या दोन महिन्यांमध्ये पूर्ण केले जाणार आहे. सर्वेक्षणाचे काम पूर्ण झाल्यानंतर आराखडा बनवण्याची प्रक्रिया सुरू केली जाणार आहे. या आराखड्यामध्ये परिसराचे सुशोभीकरण करण्याबरोबरच अत्यावश्यक पायाभूत सुविधा आणि अन्य विकास कामे करण्याचे नियोजन आहे.'
.
वन सल्लागाराची नेमणूक
आळंदी, भीमाशंकर आणि नीरा नरसिंहपूर या तीर्थक्षेत्रांच्या विकास आराखड्याला मंजुरी मिळाली आहे. मात्र, विकासकामे संथगतीने सुरू आहेत. या संदर्भात गेल्या आठवड्यात विभागीय आयुक्त दीपक म्हैसेकर यांनी बैठकीचे आयोजन केले होते. त्या वेळी भीमाशंकर विकास आराखड्यातील कामांचा आढावा घेण्यात आला. या विकास आराखड्यातील कामे करण्यात अडथळा येत असल्याने वन सल्लागार नेमण्याचाही निर्णय झाला आहे. आळंदी तीर्थक्षेत्र विकास आराखड्यासाठी गेल्या आठवड्यात आणखी निधी मंजूर झाला आहे. आता जेजुरी तीर्थक्षेत्राचा हे विकास केला जाणार आहे.