पुण्यात देवेंद्र फडणवीसांच्या एण्ट्रीआधी भाजपच्या कार्यकर्त्यांनी डावलला नेत्यांचा आदेश!

पुणे : भाजपच्या मध्यवर्ती कार्यालयाचं उद्घाटन आज पक्षाचे नेते आणि विधानसभेचे विरोधी पक्षनेते देवेंद्र फडणवीस यांच्या हस्ते होत आहे. या पार्श्वभूमीवर भाजप कार्यकर्त्यांकडून संपूर्ण पुणे शहरात मोठ्या प्रमाणात बॅनरबाजी करण्यात आली आहे. (Devendra Fadanvis News)

सिंहगड रोड येथे राजाराम पूल ते फन टाइम उड्डाण पुलाचे भूमीपूजन काही दिवसांपूर्वी केंद्रीय मंत्री नितीन गडकरी यांच्या हस्ते करण्यात आले होते. त्यावेळीही अशाच प्रकारे बॅनरबाजी करण्यात आली होती. तेव्हा खासदार गिरीश बापट यांनी असे बॅनर न लावण्याचं आवाहन केलं होतं. हा खर्च योग्य कामासाठी वळवावा, असं बापट म्हणाले होते. मात्र असं असतानाही वरिष्ठ नेत्यांना आपला फ्लेक्स दिसावा यासाठी चौका-चौकात मोठमोठ्या बॅनरची स्पर्धाच लागल्याचं चित्र आज पुणेकरांना पाहायला मिळालं. यामध्ये आजी-माजी नगरसेवकांची संख्या मोठी होती.

Omicron Variant In Karnataka: कर्नाटकची वाटचाल लॉकडाऊनच्या दिशेने?; नव्या गाइडलाइन्स जाहीर

दरम्यान, भाजपच्या स्थापनेपासून बुधवार पेठेतील जोगेश्वर मंदिराजवळ पक्षाचे शहर कार्यालय होते. मागील लोकसभा निवडणुकीच्या कालावधीत हे कार्यालय जंगली महाराज रस्त्यावरील सन्मान हॉटेल येथे स्थलांतरीत केले गेले. आता महापालिका भवनाजवळ भाजपचे नवीन कार्यालय सुरू होणार आहे. या कार्यालयाच्या उद्घाटनाच्या निमित्ताने बॅनरबाजी होत आहे.

omicron india : 'ओमिक्रॉन'वर लस किती प्रभावी... तिसरी लाट येणार का? केंद्राने केले शंकांचे निरसन

पुणे महापालिका रस्त्यावर कोणतेही बॅनर उभे करण्यासाठी परवानगी देत नाही. हे बॅनर अनधिकृत याच प्रकारात मोडत असतानाही सत्ताधारी भाजपच्याच कार्यकर्त्यांनी हा नियम मोडला आहे.

दरम्यान, शहरात वेगवेगळ्या ठिकाणी बॅनरबाजी करणाऱ्या कार्यकर्त्यांचे कान भाजपचे वरिष्ठ नेते टोचणार का, हे पाहावं लागेल.