म. टा. प्रतिनिधी, पुणे'करोनाच्या संकटामुळे भारतासह जगभरात व्यापक बदल होत आहेत. 'डिजिटल ट्रान्स्फर्मेशन' ही काळाची गरज बनली आहे. पारंपरिक आणि ऑनलाइन शिक्षणाची सांगड हे वास्तव आपल्याला स्वीकारावे लागेल. भविष्यात व्यक्तीच्या गरजेनुसार केव्हाही, कुठेही, कोणतेही शिक्षण कोणालाही घेता येणे शक्य होईल व हेच 'न्यू नॉर्मल' असेल,' असा विश्वास अखिल भारतीय तंत्रशिक्षण परिषदेचे (एआयसीटीई) अध्यक्ष प्रा. डॉ. अनिल सहस्रबुद्धे यांनी व्यक्त केला.टाइम्स समूहाचा भाग असलेल्या बेनेट युनिव्हर्सिटीतर्फे आयोजित 'एआय सोल्यूशन फॉर कोव्हिड' या ग्लोबल वेबिनारच्या समारोप सत्रात ते बोलत होते. ते म्हणाले, 'करोनाचे संकट हा संपूर्ण जगालाच अनपेक्षित धक्का आहे. त्यामुळे जगभरात अनेक बदल झाले आहेत, होत आहेत. गेल्या दोन महिन्यांत आणि पुढील महिनाभरात आपल्याला आलेले, येणारे अनुभव खूप काही शिकवणारे असतील. त्यातून आपल्या आयुष्यात व्यापक बदल घडणार आहेत.' 'सध्याच्या काळात डिजिटल ट्रान्स्फर्मेशन महत्त्वाचे आहे. ऑनलाइन शिक्षणाला महत्त्व आले आहे. भारताने पूर्वीच याची गरज ओळखून 'स्वयम' या ऑनलाइन पोर्टलवर अडीच हजारांहून अेधिक मोफत अभ्यासक्रम उपलब्ध करून दिले आहेत. आज भारतातच नव्हे, तर १६० देशांमधून दीड कोटींहून अधिक व्यक्तींनी त्याचा लाभ घेतला आहे,' असे प्रा. डॉ. सहस्रबुद्धे म्हणाले.''एआयसीटीई'च्या 'नॅशनल टेक्निकल अलायन्स फॉर टेक्नॉलॉजी'च्या (एनईएटी) माध्यमातून काही सशुल्क ऑनलाइन अभ्यासक्रम सुरू करण्यात आले होते. त्यासाठी १५ कंपन्यांनी ३० अभ्यासक्रम उपलब्ध केले होते; परंतु लॉकडाउनच्या काळात हे अभ्यासक्रम मोफत उपलब्ध करून देण्यात आले. इतकेच नव्हे, तर अभ्यासक्रमांची संख्या वाढवून ४९ करण्यात आली. हे अभ्यासक्रम आणखी किमान महिनाभर उपलब्ध असतील. त्याचबरोबर 'स्वयमप्रभा' या ३२ दूरचित्रवाणी वाहिन्यांच्या माध्यमातून स्थानिक भाषांमधूनही दूरशिक्षणाची सोय उपलब्ध करून देण्यात आली. संपूर्ण भारतीय बनावटीच्या व्हिडिओ कॉन्फरन्सिंग सोल्युशनच्या निर्मितीसाठी; तसेच करोनासंदर्भातील औषधे व लस शोधण्यासाठी हॅकेथॉनचे आयोजन करण्यात आले आहे,' असे त्यांनी नमूद केले.
डिजिटल ट्रान्स्फर्मेशन ही काळाची गरज
म टा प्रतिनिधी, पुणे'करोनाच्या संकटामुळे भारतासह जगभरात व्यापक बदल होत आहेत 'डिजिटल ट्रान्स्फर्मेशन' ही काळाची गरज बनली आहे...
महाराष्ट्र टाइम्स.कॉम 27 May 2020, 4:00 am