पुणे : पेण नजीक हमरापूर गावात गणेशाच्या मूर्त्यांचे प्रचंड प्रमाणावर उत्पादन होते. या मूर्त्या प्लास्टर ऑफ पॅरिसमध्ये असतात व रंगविलेल्या नसतात. मोठ्या प्रमाणावर उत्पादन होत असल्याने भाव कमी असतात. त्यामुळे हल्ली या दोन्ही गावांमधून मूर्ती आणून विकण्याचे प्रमाण वाढले आहे. यामुळे भविष्यात कुशल मूर्तिकार निर्माणच होणार नाहीत,' अशी खंत मूर्तिकार दिलीप साप्ते यांनी व्यक्त केली. दिलीप साप्ते यांनी तयार केलेल्या मूर्त्या बसविणारी ६०पेक्षा अधिक गणेश मंडळे पुण्यात आहेत.
साप्ते कुटुंबीय मूळचे रोह्यानजीकच्या अष्टम गावातले. दिलीप साप्ते यांचे आजोबा जनार्दन मूर्ती करीत असत. जनार्दन यांचे निधन झाल्याने त्यांचे चिरंजीव सदानंद वयाच्या दहाव्या वर्षी पुण्यात आले. सदानंद साप्ते स्वतःच मूर्ती करण्यास शिकले. १९५४ पासून त्यांनी गणेशोत्सवासाठी मूर्ती तयार करण्यास सुरुवात केली. त्या काळात शाडू मातीच्या मूर्ती असत. चोळखण आळीतील मंडळासाठी पैलवान रूपातील मूर्ती त्यांनी केली होती. नारायण पेठेतील प्रगतीशील मंडळ, पर्वतीमधील विनायक मंडळ, वडार समाजाचा गणपती आदी गणपती तसेच नरेंद्र मंडळ नवा विष्णू चौक, रामेश्वर मंडळ यांचे हलते देखावे त्यांनी साकारले. दिलीप यांनी वयाच्या नवव्या वर्षी वडिलांकडे मूर्तिकाम शिकण्यास सुरुवात केली. जंगली महाराज रस्त्यावरील गणपती, नाना हौद, नरेंद्र मंडळ लक्ष्मी रस्ता, सूर्या हॉस्पिटलजवळील जनता जनार्दन, जय महाराष्ट्र मंडळ दत्तवाडी आदी मंडळे साप्ते यांनी केलेल्या मूर्ती उत्सवात बसवतात. वारजे गावातील मानाच्या गणपतीची सहा फुट उंचीची मूर्ती दिलीप यांनी घडविलेली आहे. विजय बराटे यांच्या कुस्ती सर्कलसाठी चार फूट उंच हनुमान गणेश यांनीच तयार केलेला आहे. दिलीप मिरवणुकीसाठी रथाचे ही काम करतात. १९९४ साली त्यांनी त्वष्टा कासार मंडळाच्या मूळ मूर्तीसारखी मूर्ती फायबर व मार्बल कास्टिंगमध्ये तयार करून दिली. दिलीप यांच्या पत्नी दिपाली व कन्या प्रज्ञा पोटफोडे, नित्या तांबट तसेच पुतण्या प्रसन्न हेही या कामात सहभागी असतात.