म. टा. प्रतिनिधी, पिंपरी
पोलिस महासंचालक सुबोधकुमार जयस्वाल हे आज, मंगळवारी (१६ एप्रिल) पिंपरी-चिंचवड आयुक्तालयाची पाहणी करण्यासाठी येणार आहेत. आयुक्तालयाच्या कामकाजाचा आढावा आणि आगामी निवडणुकांच्या पार्श्वभूमीवर महासंचालक आयुक्त आर. के. पद्मनाभन आणि अन्य अधिकाऱ्यांची बैठक या वेळी घेणार आहेत. पुणे शहर आणि ग्रामीण पोलिस दलाचे विभाजन करून आठ महिन्यांपूर्वी पिंपरी-चिंचवड पोलिस आयुक्तालयाची निर्मिती करण्यात आली आहे.
९ जानेवारी २०१९ ला आयुक्तालयाच्या प्रेमलोकपार्क येथील इमारतीचे उद्घाटन मुख्यमंत्री देवेंद्र फडवणीस यांच्या हस्ते झाले होते. तेव्हा तत्कालीन महासंचालक दत्ता पडसलगीकर हे देखील होते. मात्र, तेव्हा आयुक्तालयाच्या कामकाजाचा आढावा, अडचणी याबाबत माहितीचा धावता आढावा घेण्यात आला होता. परंतु, त्याबाबत स्वतंत्र चर्चा झाली नव्हती. त्यामुळे आता नवनियुक्त महासंचालक जयस्वाल यांच्या स्वतंत्र भेटीकडे सर्वांचे लक्ष लागले आहे.
शहर पोलिसांना आयुक्तालय कार्यान्वित झाल्यापासून अनेक अडचणींचा सामना करावा लागत आहे. मनुष्यबळाची कमतरता, वाहने, स्वतंत्र १०० क्रमांक, इन्फ्रास्ट्रक्चर, मुख्यालयासाठी मैदान, आयुक्तालयाला स्वतःच्या मालकीची जागा, पोलिस वसाहत, पोलिसांना दैनंदिन भेडसावणारे प्रश्न आणि निवडणुकीचे नियोजन याबाबत जयस्वाल हे माहिती घेणार आहेत. आयुक्तालय कार्यान्वित झाल्यापासून याभागातील गुन्ह्यांचा आलेख उतरता राहिला आहे. मात्र, संपूर्ण पिंपरी-चिंचवड आयुक्तालयाच्या कार्यक्षेत्रात प्रभावी कामकाजासाठी मनुष्यबळाची नितांत आवश्यकता आहे. त्याबाबत जयस्वाल काय सकारात्मक तोडगा काढतात हे बैठकीनंतर स्पष्ट होणार आहे.
नवे आयुक्तालय कार्यान्वित झाल्यावर कागदी घोडे नाचवत पुणे शहर आणि ग्रामीण पोलिस प्रमुखांकडून पिंपरी-चिंचवडला मनुष्यबळ, वाहने देताना अडकाठी आणल्याचे यापूर्वी स्पष्ट झाले आहे. त्याचबरोबर पिंपरी-चिंचवडला काम करणाऱ्या अधिकाऱ्यांना बेकायदेशीर अधिकारी असा शोध देखील लावण्यात आला होता. याबाबत तत्कालीन महासंचालकांकडे तक्रारी करून काही फरक पडला नव्हता. आता जयस्वाल हे शहरात येत असल्याने याबाबत ते काय निर्णय घेतात यावर शहरातील कायदा-सुव्यवस्था अबाधीत राखण्यावर परिणाम होणार आहे.
\Bपुण्यातही घेणार आढावा\B
महासंचालक जयस्वाल हे पुणे आयुक्तालयातदेखील आढावा घेणार आहेत. पुणे शहर आयुक्त डॉ. के. व्यंकटेशम्, पुणे ग्रामीणचे अधीक्षक संदीप पाटील आदींसह वरिष्ठ अधिकारी या वेळी उपस्थित असणार आहेत.