पुण्यात काँग्रेसची डोकेदुखी वाढली; कसब्यात बंडखोरीची भीती तर मोठा नेता भाजपच्या वाटेवर?

पुणे: आमदार मुक्ता टिळक यांच्या निधनानंतर रिक्त झालेल्या कसबा पेठ पोटनिवडणुकीसाठी आज भाजपकडून हेमंत रासने उमेदवारी अर्ज भरणार आहेत. तर काँग्रेसने रवींद्र धंगेकर यांना उमेदवारी अर्ज भरण्याची तयारी करण्याच्या सूचना दिल्या आहेत. मात्र उमेदवारी अर्ज दाखल करण्यापूर्वीच काँग्रेसची डोकेदुखी वाढण्याचे चित्र आहे. रवींद्र धंगेकर यांना काँग्रेसने ग्रीन सिग्नल दिल्याने नाराज झालेले काँग्रेसचे जेष्ठ नेते बाळासाहेब दाभेकर हे बंडखोरी करण्याचा तयारीत आहेत.

कसब्यात पोटनिवडणुकीसाठी काँग्रेसने उमेदवारी अर्ज दाखल करण्याची वेळ जाहीर केली असली तरी उमेदवारी मात्र अधिकृतरीत्या जाहीर केली नाही. मात्र, रवींद्र धंगेकर यांना उमेदवारी अर्ज दाखल करण्याच्या सूचना काँग्रेस पक्ष नेतृत्वाने दिल्या आहेत. धंगेकर आज उमेदवारी अर्ज दाखल करणार आहेत. यामुळेच काँग्रेसचे जेष्ठ नेते बाळासाहेब दाभेकर नाराज झाले असून त्यांनी अपक्ष निवडणूक लढवण्याची तयारी केली आहे. यामुळे काँग्रेसची डोकेदुखी वाढली आहे.

मनसेमधून काँग्रेसवासी झालेल्या रवींद्र धंगेकर यांना तिकीट दिल्याने दाभेकर नाराज आहेत. बाळासाहेब दाभेकर यांनी निष्ठावंतांना डावलून बाहेरच्या उमेदवारांना तिकीट दिल्यास बंडखोरी करणार असल्याचे आव्हान दिले आहे. तर अपक्ष निवडणूक लढवणार असल्याचे जाहीर केले आहे.

वाचाः तुम्हीदेखील घराबाहेर चावी लपवून ठेवताय?; पुण्यात घडलेली ही धक्कादायक घटना एकदा वाचाच

तर दुसरीकडे माजीमंत्री रमेश बागवे यांचे पुत्र माजी नगरसेवक अविनाश बागवे हे भाजपच्या वाटेवर असल्याच्या चर्चा आहेत. काल काँग्रेस भवन येथे झालेल्या कार्यक्रमात माजी नगरसेवक रशीद शेख यांना पुन्हा पक्षात प्रवेश दिल्याने अविनाश बागवे नाराज आहेत. त्यांना पक्ष प्रवेश नको होता. तस त्यांनी पक्ष नेतृत्वाला कळवले देखील होते.

रशीद शेख यांना पुन्हा पक्षात प्रवेश देऊ नका असा अविनाश बागवे यांचा आग्रह होता. पक्ष नेतृत्वाने बागवे यांना तसा विश्वास देखील दिला होता. मात्र अखेर प्रदेशाध्यक्ष नाना पटोले यांनी रशीद शेख यांना प्रवेश दिल्याने बागवे नाराज आहेत. त्यामुळे रविवारी दिवसभर काँग्रेस भवन येथे नेत्यांची रेलचेल असताना देखील बागवे इकडे फिरकले देखील नाहीत. दुसरीकडे यामुळे नाराज झालेले अविनाश बागवे आता लवकरच भाजपमध्ये प्रवेश करणार असल्याच्या चर्चा सुरु झाल्या आहेत.

वाचाः लहान असतानाच आईच्या मायेला पोरकी, १३ वर्षांची होताच बापाने केला वारंवार अत्याचार, अखेर...

तिकडे नगरमध्ये आधीच काँग्रेसला सत्यजित तांबे यांच्या बंडानंतर धक्के बसत असताना काँग्रेसचे जेष्ठ नेते बाळासाहेब थोरात यांनी नाना पटोले यांच्या सोबत काम करणे शक्य नसल्याचे पत्र दिल्लीतील पक्षश्रेष्ठीना लिहले आहे. त्यामुळे आधीच काँग्रेस संकटात असताना पुण्यात देखील नाराजीनाट्य सुरु झाल्याने काँग्रेसच्या अडचणीत भर पडली आहे.

वाचाः VIDEO: सलग दोन भूकंपांनी तुर्की हादरले; ७.८ रिश्टर स्केलची तीव्रता, अनेक इमारती जमिनदोस्त