म. टा. प्रतिनिधी, पुणे
जिवंत देखावे...फुलांचा वापर करून आकर्षक सजवलेले रथ....आकर्षक विद्युत रोषणाई...डीजे सिस्टिमबरोबरच पारंपरिक ढोल ताशा पथकांचा सहभाग....अशा वातावरणात टिळक रस्त्यावरील गणेश विसर्जन मिरवणूक पार पडली. यंदा टिळक रस्त्यावरून १५६ मंडळांच्या गणपतींचे विसर्जन झाले.
पूरम चौकातील वसंतदादा पाटील पुतळ्यापासून टिळक रस्त्यावरील मिरवणुकीला प्रारंभ झाला. अखिल नवी पेठ हत्ती गणपती मंडळाचा गणपती टिळक रस्त्यावरून पहिल्यांदा मार्गस्थ झाला. मंडळाची मिरवणूक ११ वाजता सुरू झाली. आकर्षक सजावट केलेल्या रथातून निघालेल्या या मिरवणुकीत दोन ढोलपथकांचा समावेश होता. सायंकाळी सात वाजता गणपतीचे विसर्जन झाले.
ग्राहक पेठ सेवक गणेशोत्सव मंडळाची मिरवणूक सायंकाळी सुरू झाली. यामध्ये ज्ञानप्रबोधिनीचे महिला पथक सहभागी झाले होते. या पथकाने सादर केलेले बरची नृत्य या मिरवणुकीचे वैशिष्ट्य ठरले. या मंडळासोबत कलावंत ढोल ताशा पथकासह अन्य पथके सहभागी झाली होती. श्रीमंत भिकारदास मारूती मंडळाची गणेशमूर्ती लक्ष वेधून घेत होती. शिवदर्शन मित्र मंडळाने पोलिस आणि बळीराजा यांच्या व्यथांवर आधारित जिवंत देखावा सादर केला होता. दर्शन मित्रमंडळाने 'तिरंगाच माजी जात' हा देखावा सादर केला होता. सत्यवीर मित्र मंडळ ट्रस्टने सद्यपरिस्थितीवर आधारित 'काय चाललयं काय' हा जिवंत देखावा सादर केला होता. शिवांजली मित्र मंडळाने एलईडीच्या माध्यमातून साकारलेली देवीची मूर्ती भाविकांचे आकर्षण ठरली. रंगीबेरंगी छत्र्यांच्या सजावटीत सजलेला टिळकरोड एकता मित्र मंडळाचा बाप्पाही सर्वांचे लक्ष वेधून घेत होता. फुलांच्या आकर्षक सजावटीमुळे खजिना विहीर मंडळाच्या गणपतीचे सौंदर्य आणखी खुलले होते. फुलांच्या नयमरम्य सजावटीत साने गुरुजी मंडळाचा शिवपार्वती रथ आणि फेटेधारी गणराय पाहण्यासाठी गर्दी झाली होती. श्री चिमण्या गणपती मंडळ, टिळक रोड गणेशोत्सव मंडळ, वंदेमातरम संघ, समाज विकास मंडळ, साई मित्र मंडळ, राजर्षी शाहू मित्र मंडळ, अचानक मित्र मंडळ, विश्वास सांस्कृतिक मित्र मंडळ आदी या रस्त्यावरील मिरवणुकीत सहभागी झाले होते. डीजेवर बंदी असतानाही अनेक मंडळांनी डीजेचा दणदणाट केला. रात्री साडेबारापर्यंत डीजे वाजत होते. सकाळी सहाच्या ठोक्याला पुन्हा डीजेचा दणदणाट सुरू झाला. सकाळी पोलिसांनी मिरवणुकीला गती दिली. या मार्गावरून भवानी पेठेतील गोकुळ वस्ताद तालीम हे अखेरचे मंडळ मार्गस्थ झाले.
- टिळक रस्त्यावर एलईडी रथात सजलेला नेहरू तरूण मंडळाचा 'महोत्कट गणेश' लक्ष वेधून घेत होता.
- फुलाफळांची आकर्षक सजावट केलेल्या पांडुरंग रथात विराजमान झालेली श्री छत्रपती शिवाजी मार्केट यार्ड मंडळाच्या शारदा-गजाननाची मूर्ती.