म. टा. प्रतिनिधी, पुणे
समाज आणि डॉक्टरांमध्ये दरी निर्माण होत असताना त्यांच्यामध्ये एकमेकांबद्दल विश्वास निर्माण करून त्यांच्यामधील नाते दृढ करण्याची आज गरज आहे, असे मत एअर मार्शल भूषण गोखले (निवृत्त) यांनी व्यक्त केले. डॉक्टरांचे चांगले कार्य पुढे आणून हे नाते घट्ट करण्यासाठी 'महाराष्ट्र टाइम्स' पुढाकार घेत आहे, असे गौरवोद्गारही त्यांनी या वेळी काढले.
'महाराष्ट्र टाइम्स'च्या 'आयकॉन्स ऑफ हेल्थ २०१९' या पुरस्कार वितरण कार्यक्रमात ते बोलत होते. ज्येष्ठ मूत्ररोग तज्ज्ञ डॉ. सुरेश पाटणकर, ज्येष्ठ नेत्ररोग तज्ज्ञ डॉ. श्रीकांत केळकर, मधुमेह तज्ज्ञ डॉ. शैलजा काळे, सांधेरोपण तज्ज्ञ डॉ. नरेंद्र वैद्य यांच्यासह डॉ. राजेंद्र सोनवणे, डॉ. अनिल दुधभाते, डॉ. उमेश फलक, डॉ. विश्वास घाटगे, डॉ. कुणाल रसाळ, डॉ. विद्याधर गिरी, डॉ. हृषिकेश सराफ, डॉ. अमित नले, डॉ. खंडू पाठक, डॉ. संगीता वाघमोडे, डॉ. मनोज शहा, डॉ. विक्रम मेहेंदळे, डॉ. महेश चकोर, सॉल्ट केव्ह एशिया, डॉ. जयंत अभ्यंकर, डॉ. स्वप्नील धर्माधिकारी, विदुला शेंडे यांना गौरविण्यात आले.
एअर मार्शल गोखले म्हणाले, 'सामान्य माणसांबद्दल डॉक्टर काळजी घेत आहेत. डॉक्टरांचे चांगले काम समाजापुढे आणण्याचे कार्य 'महाराष्ट्र टाइम्स' करीत आहे. हे कौतुकास्पद आहे. त्यामुळे डॉक्टर आणि समाज यांचे नाते दृढ होत आहे.' 'महाराष्ट्र टाइम्स'चे ब्रँड सरव्यवस्थापक प्रिणय मंजेश्वर, जाहिरात विभागाचे सरव्यवस्थापक गौरव आहुजा आदी या वेळी उपस्थित होते. वरिष्ठ व्यवस्थापक दीपक खैरनार यांनी आभार मानले.