म. टा. प्रतिनिधी, पिंपरी
'जात, धर्म, भाषा आणि वंशापेक्षा देश मोठा असून, आपण सर्वप्रथम आणि शेवटीही भारतीय आहोत. या तत्त्वाचा विसर पडता कामा नये,' असे प्रतिपादन केंद्रीय सामाजिक न्याय राज्यमंत्री रामदास आठवले यांनी बुधवारी केले.
पिंपरी-चिंचवड महापालिकेने भारतरत्न डॉ. बाबासाहेब आंबेडकर पुतळा चौकात उभारलेल्या भीमसृष्टीचे उद्घाटन आणि माता रमाई पुतळ्याच्या कामाचा प्रारंभ आठवले यांच्या हस्ते झाला. त्या वेळी ते बोलत होते. अध्यक्षस्थानी महापौर राहुल जाधव होते. खासदार श्रीरंग बारणे, अमर साबळे, आमदार महेश लांडगे, ॲड. गौतम चाबुकस्वार, डॉ. राहुल बोधी, स्थायी समितीचे अध्यक्ष विलास मडिगेरी, नवनगर विकास प्राधिकरणाचे अध्यक्ष सदाशिव खाडे, साहित्यरत्न लोकशाहीर अण्णा भाऊ साठे आर्थिक विकास महामंडळाचे अध्यक्ष अमित गोरखे, आयुक्त श्रावण हर्डीकर या वेळी उपस्थित होते.
भीमसृष्टीच्या माध्यमातून नागरिकांच्या आकांक्षा पूर्ण करण्याचा प्रयत्न महापालिका करीत असल्याचे नमूद करून आठवले म्हणाले, 'भारतरत्न डॉ. बाबासाहेब आंबेडकरांनी देशाचे संविधान लिहून सर्व जाती धर्माच्या लोकांना एकत्र ठेवण्याचे काम केले आहे. भीमसृष्टीतून बाबासाहेबांच्या कार्याची ओळख पिढ्यानपिढ्या होण्यास मदत होणार आहे.' 'भोसरी येथील प्राधिकरणाच्या सेक्टर क्रमांक ११ येथे संविधान भवनाची निर्मिती करण्यात येणार असून, त्यामध्ये अभ्यासिकेचा समावेश राहील,' अशी माहिती महापौर जाधव यांनी दिली.
प्रास्ताविक आयुक्त श्रावण हर्डीकर यांनी केले. सहायक आयुक्त अण्णा बोदडे यांनी आभार मानले. प्रकल्प निर्मितीत योगदान देणाऱ्या शरद जाधव, डॉ. राजाभाऊ भैलूमे, सुनील वाघुंडे, नागनाथ वळते, विजय जाधव, भगवान मोरे, गिरीश आवटे यांचा या वेळी विशेष सत्कार करण्यात आला.
.
नाराजीनंतर 'फ्लेक्स' बदलला
भीमसृष्टीच्या उद्घाटनानिमित्त महापालिकेने उभारलेल्या व्यासपीठावरील फ्लेक्समध्ये आठवले यांच्यासह भारतीय जनता पक्षाचे शहराध्यक्ष आमदार लक्ष्मण जगताप, आमदार महेश लांडगे यांची नावे होती. पिंपरी मतदारसंघात प्रकल्प असूनही येथील शिवसेनेचे आमदार अॅड. गौतम चाबुकस्वार यांचे नाव नव्हते. त्यामुळे त्यांनी तीव्र नाराजी व्यक्त केली. त्याची दखल घेत पालिकेने कार्यक्रमाच्या वेळेतच तातडीने बदल करून चाबुकस्वारांच्या नावाचा समावेश असलेला फ्लेक्स बदलला. याशिवाय चाबुकस्वार यांना मनोगत व्यक्त करण्याची संधी देऊन झालेली चूक दुरुस्त करण्याचा प्रयत्न केला. याची चर्चा रंगली होती.
.
मानसिकतेचा धिक्कार
भीमसृष्टीमध्ये डॉ. बाबासाहेबांच्या जीवनावरील १९ प्रसंगांवरील म्युरल्स बसविण्यात आले आहेत. त्यामध्ये 'मनुस्मृती दहन' हे म्युरल बसविण्याची मागणी सामाजिक कार्यकर्ते मारुती भापकर यांनी केली. ते म्हणाले, 'भीमसृष्टीत मनुस्मृती दहनाच्या प्रसंगाचे म्युरल बसविण्याची मागणी सातत्याने केली होती. परंतु, तरीही हा ऐतिहासिक आणि क्रांतिकारी प्रसंग वगळण्यात आला. समाजात विषमतावादी आणि वर्णवादी व्यवस्थेला थारा देणाऱ्या मनुस्मृतीच्या दहनाची घटना क्रांतिकारी होती. हा महत्त्वाचा प्रसंग १९ म्युरल्समध्ये समाविष्ट केलेला नाही. एकीकडे संसदेसमोर देशाचे संविधान जाळले जाते. दुसरीकडे मनुस्मृती दहनाचा प्रसंग पडद्याआड करण्याचा प्रयत्न केला जातो. या मानसिकतेचा आम्ही धिक्कार करीत आहोत.'
.
पिंपरी-चिंचवड महापालिकेने भारतरत्न डॉ. बाबासाहेब आंबेडकर पुतळा चौकात उभारलेल्या भीमसृष्टीचे उद्घाटन आणि माता रमाई पुतळ्याच्या कामाचा प्रारंभ केंद्रीय राज्यमंत्री रामदास आठवले यांच्या हस्ते बुधवारी झाला. महापौर राहुल जाधव आणि प्रमुख पदाधिकारी या वेळी उपस्थित होते.
.....
(सचिन फुलसुंदर)