म. टा. प्रतिनिधी, पुणे
'रस्त्यावर फिरणाऱ्या निराधार मनोरुग्णांसाठी काम करणे सुरू केले तेव्हा प्रचंड अडचणी आल्या, लोकांकडून विरोधही झाला. या अडचणींमुळे हाती घेतलेले काम सोडून द्यायचेही मनात आले. पण हे काम सोडून दिले तर पुन्हा कधीही रस्त्यावरील मनोरुग्णांकडे नजर वर करून पाहू शकणार नाही, असे वाटले. तो माझ्यासाठी 'टर्निंग पॉइंट' ठरला. कोणतेही सामाजिक काम केवळ लोकांनी स्तुती करावी किंवा समाजमाध्यमांवर 'लाइक्स' मिळावेत या उद्देशाने करू नका. आपल्या कामावर विश्वास ठेवून कार्यरत राहिलात तरच ते तडीस नेऊ शकाल,' असा कानमंत्र रॅमन मॅगसेसे पुरस्कार विजेते डॉ. भरत वाटवाणी यांनी विद्यार्थ्यांना दिला.
पी. एम. शहा फाउंडेशनतर्फे आयोजित आरोग्य चित्रपट महोत्सवाचे उद्घाटन वाटवाणी यांच्या हस्ते करण्यात आले. त्या वेळी ते बोलत होते. पी. एम. शहा फाउंडेशनचे संचालक अॅड. चेतन गांधी, अध्यक्ष अॅड. किरण कोठाडिया, सामाजिक कार्यकर्ते डॉ. अरुण गद्रे, विक्रम कळुसकर, जितू ताथेड आदी या वेळी उपस्थित होते. या दोन दिवसांच्या महोत्सवात भारतातून आणि परदेशातून आरोग्यविषयक प्रश्न मांडणारे ३५ निवडक लघुपट व माहितीपट दाखवले जाणार आहेत.
'बाबा आमटे आणि प्रकाश आमटे यांचे काम बघायला आम्ही गेलो असताना वाटेत एक मनोरुग्ण व्यक्ती हातापायांत बेड्या घातलेल्या अवस्थेत रस्त्याने चालताना दिसली. त्या माणसाला घेऊन मी प्रकाश आमटे यांच्या दवाखान्यात गेलो. त्यांनी स्वतः छिन्नी-हातोडा घेऊन हळुवारपणे त्यांच्या बेड्या तोडल्या आणि त्याच्यावर उपचार केले. त्या दिवशी मी बाबा आमटेंना रडताना पाहिले. एखाद्या माणसाच्या हातापायात बेड्या घालून त्याला सोडून कसे देऊ शकतात, या विचाराने ते व्यथित झाले होते. हा प्रसंग माझ्या मनाला स्पर्शून गेला. त्या ४८ तासांत मी बदललो होतो. मला वडिलांसारखा असलेला माझा देव भेटला होता,' असे सांगत वाटवाणी यांनी बाबा आमटेंच्या आठवणींना उजाळा दिला. मोनिका जोशी यांनी कार्यक्रमाचे सूत्रसंचालन केले.
--------------------