नर्सची टवाळी थांबवा

आमदार नीलम गोऱ्हे यांचे आवाहन

म. टा. प्रतिनिधी, पुणे

‘नाटक, चित्रपटांमधून नर्सचे चुकीचे चित्रण केले जाते. या माध्यमांतून नर्सची होणारी टिंगलटवाळी रोखण्याची आवश्यकता असून, संबंधितांना चांगली अद्दल घडवायला हवी,’ असे मत शिवसेनेच्या आमदार डॉ. नीलम गोऱ्हे यांनी व्यक्त केले.
महाराष्ट्र जिल्हा परिषद नर्स संघटनेच्यावतीने परिचारिका दिन आणि जिल्हास्तरीय मेळाव्याचे आयोजन करण्यात आले होते. या वेळी जिल्हा परिषदेचे बांधकाम आणि आरोग्य सभापती प्रवीण माने, आरोग्य उपसंचालक डॉ. हनुमान चव्हाण, जिल्हा आरोग्य अधिकारी डॉ. भगवान पवार, शिवसेना जिल्हा संपर्कप्रमुख विजया शिंदे, महाराष्ट्र जिल्हा परिषद नर्सेस संघटनेच्या अध्यक्षा राजश्री सादीगले, सरचिटणीस रोहिणी आहेर आदी उपस्थित होते.
‘पेशंटची सुश्रृषा करणाऱ्या आऱोग्य सेविकांनी आपल्या आरोग्याकडे लक्ष द्यायला हवे. कामाच्या ठिकाणी त्रास होत असल्यास विशाखा समितीची मदत घ्यायला हवी. नर्सना २४ तास काम करावे लागते. त्यामुळे कामाचा ताण येतो. त्यांच्यासाठी व्यायामशाळा, वाचनालये, सांस्कृतिक केंद्रे पाहिजेत,’ असेही गोऱ्हे म्हणाल्या. या वेळी जिल्ह्यातील नर्सच्या सांस्कृतिक सभागृहासाठी त्यांनी पाच लाख रुपयांचा निधी जाहीर केला.
माने यांनी आरोग्य विभागाच्या कामगिरीचा आढावा घेतला. ‘येत्या दोन ते तीन महिन्यात ग्रामीण भागातील नागरिकांच्या आरोग्य तपासणीसाठी अद्ययावत मोबाइल व्हॅन घेण्यात येणार आहे. जिल्ह्यातील १४०० ग्रामपंचायतींच्या परिक्षेत्रात व्हॅनच्या माध्यमातून आरोग्य तपासणी केली जाणार आहे. डिजिटल प्राथमिक आरोग्य केंद्र, सोलर प्राथमिक आरोग्य केंद्र असे महत्त्वाकांक्षी उपक्रम ही हाती घेण्यात येणार आहे,’ असे माने म्हणाले.

हॉस्पिटलमध्ये विशाखा समिती
नर्सवर अत्याचार किंवा त्यांचे लैंगिक शोषण होऊ नये यासाठी प्रत्येक सरकारी हॉस्पिटलमध्ये विशाखा समिती स्थापन करण्यात यावी, अशा सूचना जिल्हा परिषदेच्या आरोग्य विभागाला देण्यात आल्या आहेत. या समित्यांमध्ये जेष्ठ नर्स आणि स्थानिक सामाजिक संस्थांच्या प्रतिनिधींचा समावेश करावा, अशा मागण्या गोऱ्हे यांनी केल्या.