साहित्य संमेलनाच्या अध्यक्षपदी डॉ. अरुणा ढेरे

पुणे :

यवतमाळ येथे होणाऱ्या ९२ व्या अखिल भारतीय मराठी साहित्य संमेलनाच्या अध्यक्षपदी कवयित्री, समीक्षक डॉ. अरुणा ढेरे यांची निवड करण्यात आली आहे. आज रविवारी झालेल्या बैठकीत ढेरे यांच्या नावावर एकमत झालं. संमेलन ११ ते १३ जानेवारी २०१९ या कालावधीत होणार आहे.

अरुणा ढेरे यांच्या रुपाने तब्बल १८ वर्षांनी एक महिला संमेलनाध्यक्षपदी विराजमान होणार आहे. यापूर्वी डॉ. विजया राजाध्यक्ष यांनी २००१ मध्ये अध्यक्षपद भूषवलं होतं. आतापर्यंत संमेलनाच्या इतिहासात कुसुमावती देशपांडे, दुर्गा भागवत, शांता शेळके, विजया राजाध्यक्ष या चारच महिलांना संमेलनाध्यक्ष होण्याचा मान मिळाला आहे. डॉ. ढेरे या पाचव्या महिला संमेलनाध्यक्ष आहेत.

यंदाच्या संमेलनापासून अध्यक्षपदासाठी निवडणूक न घेता सन्मानाने निवड केली जाईल, असा ऐतिहासिक निर्णय अखिल भारतीय मराठी साहित्य महामंडळातर्फे घेण्यात आला होता. त्यानुसार चार घटक संस्थांकडून प्रत्येकी तीन नावे, संलग्न आणि समाविष्ट संस्थांकडून प्रत्येकी एक आणि विद्यमान संमेलनाध्यक्षांकडून एक अशी नावे मागवण्यात आली होती. प्रभा गणोरकर, अरुणा ढेरे आणि प्रेमानंद गज्वी अशी तीन नावे अंतिम निवडण्यात आली होती. त्यातून अरुणा ढेरे यांच्या नावावर शिक्कामोर्तब झाले.

डॉ. अरुणा ढेरे यांचे ६ कवितासंग्रह प्रकाशित झाले आहेत, तर कृष्णकिनारा, अज्ञात झऱ्यावर रात्री, उंच वाढलेल्या गवताखाली, मन केले ग्वाही, पावसानंतरचं ऊन हे त्यांचे कथासंग्रह आहेत. अनेक कथा, कादंबऱ्यांचे त्यांनी संपादनही केले आहे. यापूर्वी अंबरनाथ, बडोदे, वाशी, इंदूर, दापोली येथे झालेल्या विभागीय साहित्य संमेलनांचे अध्यक्षपद ढेरे यांनी भूषविले आहे. गोवा येथे २०१२ मध्ये झालेल्या महिला साहित्य संमेलनाच्या त्या अध्यक्ष होत्या.