भारतीय शिक्षण संस्थेच्या अध्यक्षपदी डॉ.भालचंद्र मुणगेकर

मटा ऑनलाइन वृत्त | पुणे

पुण्यातील भारतीय शिक्षण संस्था या प्रख्यात संस्थेच्या अध्यक्षपदी मुंबई विद्यापीठाचे माजी कुलगुरू, योजना आयोगाचे माजी सदस्य आणि राज्यसभेचे माजी खासदार डॉ.भालचंद्र मुणगेकर यांची निवड करण्यात आली आहे.

शैक्षणिक क्षेत्रातील ४० वर्षांच्या संपन्न आणि प्रदीर्घ अनुभवामुळे डॉ.भालचंद्र मुणगेकर यांच्या समर्थ नेतृत्त्वामुळे भारतीय शिक्षण संस्थेला एक नवी दिशा मिळेल अशी अपेक्षा शिक्षण क्षेत्रात व्यक्त करण्यात येत आहे. पद्मभूषण जे.पी.नाईक आणि त्यांच्या पत्नी पद्यश्री चित्रा नाईक यांनी ५० वर्षांपूर्वी भारतीय शिक्षण संस्थेची स्थापना केली होती. शिक्षणक्षेत्रामध्ये नवीन उपक्रम सुरु करुन लोकाभिमुख शिक्षणाला वाहिलेली भारतीय शिक्षण संस्था ही भारतातील एकमेव संस्था आहे. त्याचप्रमाणे समाजातील विविध घटकांचे प्रश्न एकसंघपणे समजून घेण्यासाठी संशोधन करणे हे या संस्थेचे प्रमुख कार्य आहे.