म. टा. प्रतिनिधी, पुणे
लोकसाहित्याच्या ज्येष्ठ संशोधक आणि संकलक डॉ. सरोजिनी बाबर यांच्या जन्मशताब्दी वर्षानिमित्त त्यांना अभिवादन करण्यासाठी लोकसाहित्य संमेलन आयोजित करण्यात आले आहे. येत्या एक सप्टेंबर रोजी यशवंतराव चव्हाण नाट्यगृहात दिवसभर होणाऱ्या या संमेलनाच्या अध्यक्षपदी ज्येष्ठ कवयित्री आणि लोकसाहित्याच्या अभ्यासक डॉ. अरुणा ढेरे यांची निवड करण्यात आली आहे. या संमेलनात लोकसाहित्याच्या अनुषंगाने मंथन होणार आहे.
महाराष्ट्र साहित्य परिषद, लोकरंग सांस्कृतिक मंच, ठाणे, राज्य साहित्य आणि संस्कृती मंडळ; तसेच राष्ट्रसेवा प्रतिष्ठान, बावधन यांच्या वतीने होणाऱ्या लोकसाहित्य संमेलनाचे उद्घाटन सकाळी ११ वाजता विधान परिषदेच्या उपसभापती डॉ. नीलम गोऱ्हे यांच्या हस्ते होणार आहे. या वेळी महापौर मुक्ता टिळक, सांस्कृतिक कार्य व मराठी भाषा विकास मंत्री विनोद तावडे, राज्य साहित्य आणि संस्कृती मंडळाचे अध्यक्ष प्रा. डॉ. सदानंद मोरे, भारती अभिमत विद्यापीठाचे कुलपती डॉ. शिवाजीराव कदम उपस्थित राहणार आहेत. लोकरंग सांस्कृतिक मंचाचे प्रमुख आणि लोकसंस्कृतीचे अभ्यासक डॉ. प्रकाश खांडगे यांनी नुकतीच पत्रकार परिषदेत ही माहिती दिली. डॉ. सरोजिनी बाबर यांच्या भगिनी डॉ. कुमुदिनी पवार, साहित्य परिषदेचे कार्याध्यक्ष प्रा. मिलिंद जोशी, प्रमुख कार्यवाह प्रकाश पायगुडे, कोषाध्यक्ष सुनीताराजे पवार आणि संमेलनाचे स्वागताध्यक्ष व नगरसेवक दिलीप वेडे-पाटील या वेळी उपस्थित होते.
बाबर यांच्या कार्यकर्तृत्वाचा आढावा घेणाऱ्या चर्चासत्रात डॉ. अनिल सहस्रबुद्धे, डॉ. माहेश्वरी गावित, सिसिलिया कार्व्हालो, उल्हास पवार सहभागी होणार आहेत. लोकसाहित्य आणि संत साहित्याचे गाढे अभ्यासक डॉ. रामचंद्र देखणे यांचा 'साहित्यातील लोकरंग' हा कार्यक्रम दुपारी चार वाजता होईल. या कार्यक्रमातून महाराष्ट्राच्या लोककलांचे दर्शन होईल. मंगळागौर, भोंडला, स्त्रियांची गीते याचेही सादरीकरण असेल. शाहीर हेमंत मावळे पोवडा सादर करतील.
---