मोदीजी... बलुचिंसाठी लढता, मराठीची उपेक्षा का?

मटा ऑनलाइन वृत्त । पुणे

मराठी भाषेला अभिजात दर्जा देण्यास केंद्र सरकारकडून होणाऱ्या विलंबावरून अखिल भारतीय मराठी साहित्य संमेलनाचे अध्यक्ष डॉ. श्रीपाल सबनीस यांनी पंतप्रधान नरेंद्र मोदी यांना रोखठोक शब्दांत त्यांची 'मन की बात' सुनावली आहे. 'मोदीजी, तुम्ही पाकिस्तानातील बलुचि लोकांना स्वातंत्र्य मिळावं अशी अपेक्षा ठेवता, मग मराठीला अभिजात भाषेचा दर्जा देण्याची मागणी करणाऱ्या अकरा कोटी जनतेची उपेक्षा का करता,' असा थेट सवाल सबनीस यांनी केला आहे.

तसं पत्रच सबनीस यांनी पंतप्रधान मोदींना लिहिलं आहे. मराठीच्या अभिजात दर्जासाठी महाराष्ट्र साहित्य परिषदेकडून पंतप्रधानांना पत्र पाठविले जाणार होते. मात्र, सबनीस यांनी आधीच पत्र पाठवून त्यांच्यावर कुरघोडी केली आहे. हिंदी भाषेत लिहिलेल्या या पत्रात सबनीस यांनी बलुचिस्तानबाबत मोदींनी घेतलेल्या भूमिकेचं स्वागत केलं आहे. 'बलुचिस्तानविषयी तुम्ही घेतलेल्या भूमिकेमुळं मी प्रभावित झालो आहे. या निमित्तानं मलाही आपल्याशी एक 'मन की बात' करायची आहे. आमची मराठी भाषा सर्व निकषांवर पात्र ठरूनही आतापर्यंत तिला अभिजात भाषेचा दर्जा का मिळू शकला नाही? सहृदयी असूनही तुम्हाला आमच्या सांस्कृतिक व्यथा-वेदना कशा कळत नाहीत?,' अशा प्रश्नांची सरबत्ती सबनीस यांनी केली आहे.

'मराठी भाषेला तातडीनं अभिजात दर्जा मिळावा अशी छत्रपती शिवाजी महाराज, शाहू महाराज, संत ज्ञानेश्वर, संत तुकाराम, महात्मा फुले, रानडे, आगरकर, आंबेडकर यांच्या महाराष्ट्राची अपेक्षा आहे. त्यामुळं कृपया मराठीचा सन्मान करा. मराठीला अभिजात भाषा म्हणून घोषित करा,' अशी मागणी सबनीस यांनी केली आहे.