ड्रोन छायाचित्रणासाठी परवानगी आवश्यक

म. टा. प्रति​निधी, पुणे

गणेशोत्सवामध्ये छायाचित्रण करण्यासाठी विनापरवाना ड्रोन कॅमेरे वापरता येणार नसून, पोलिस ठाण्याकडून सात दिवसांपूर्वीच परवानगी घ्यावी लागणार आहे. परवानगी न घेता ड्रोन कॅमेऱ्यांद्वारा छायाचित्रण केल्यास दंडात्मक कारवाई होणार आहे.

गणेशोत्सवाच्या काळात अनेकांकडून ड्रोन कॅमेऱ्यांचा वापर केला जातो. यंदा गणेशोत्सवाचे शतकोत्तर रौप्य महोत्सवी वर्ष आहे. त्यामुळे गणेश मंडळे किंवा अन्य व्यक्तींकडून ड्रोन कॅमेऱ्यांचा वापर केला जाण्याची शक्यता आहे. या काळात कोणत्याही व्यक्तीला ड्रोन कॅमेरा वापरायचा असल्यास सात दिवस अगोदर स्थानिक पोलिस ठाण्याकडून परवानगी घेणे बंधनकारक करण्यात आले आहे. जिल्हाधिकारी कार्यालयाकडून याबाबत पोलिस प्रशासनाला आदेश देण्यात आले आहेत.

याबाबत निवासी उपजिल्हाधिकारी राजेंद्र मुठे म्हणाले, ‘ड्रोन कॅमेरे वापरण्याबाबत करण्यात येणारे अर्ज हे जिल्हाधिकारी कार्यालयाकडे स्वीकारले जातात. संबंधित अर्ज पोलिस आयुक्तालयाकडे पाठविण्यात येतात. अर्जदाराने संबंधित पोलिस ठाण्याकडून सात दिवस अगोदर परवानगी घेणे बंधनकारक आहे. विनापरवाना वापर केल्याचे आढळल्यास कारवाई केली जाणार आहे.’