दारूच्या नशेत दुचाकी पेटविल्या

जनता वसाहतीतील प्रकार; दुचाकी पेटविणारा अटकेत

म. टा. प्रतिनिधी, पुणे
जनता वसाहतीमधील पोलिस चौकीजवळ रस्त्याच्या कडेला लावलेल्या २७ दुचाकी, दोन सायकल आणि एक टेम्पो रविवारी पहाटे लावलेल्या आगीत जळून खाक झाले. दारूच्या नशेत एका व्यक्तीने आग लावल्यामुळे ही वाहने जळून खाक झाली. या प्रकरणी आग लावणाऱ्यास दत्तवाडी पोलिसांनी अटक केली आहे. अग्निशमन दलाने वेळीच पोहोचून आग विझवल्यामुळे पुढील मोठा अनर्थ टाळला.

दिनेश उर्फ जब्या हरी पाटील (वय २५, रा. जनता वसाहत) असे अटक केलेल्या व्यक्तीचे नाव आहे. या प्रकरणी दत्तवाडी पोलिस ठाण्यात गुन्हा दाखल करण्यात आला आहे. जनता वसाहतीमध्ये एकमेकांना लागून छोटी-छोटी घरे आहेत. डोंगरावर पायी जाण्यासाठीही व्यवस्थित रस्ता नसल्यामुळे अनेकजण रस्त्यावर आपली वाहने पार्किंग करतात. जनता वसाहत पोलिस चौकीपासून दोन किलोमीटरचा रस्ता रात्री वाहनांच्या पार्किंगने भरलेला असतो. रविवारी पहाटे दोनच्या सुमारास अचानक वाहनांना आग लागली. एका तरुणाने हा प्रकार पाहिला आणि आरडा-ओरडा करून नागरिकांना झोपेतून जागे केले. शेजारीच पोलिस चौकी असल्याने पोलिसांनी तत्काळ घटनास्थळी धाव घेतली.

नागरिकांनी अग्निशमन दलाला घटनेची माहिती दिली. पाणी टाकून आग आटोक्यात आणण्याचे प्रयत्न सुरू केले. दाटीवाटीने लावण्यात आलेल्या गाड्यांनी काही वेळातच पेट घेतला. एरंडवणे अग्निशमन दलाच्या जवानांनी घटनास्थळी धाव घेतली. तोवर आगीने रौद्र रूप धारण केले होते. अवघ्या काही वेळातच अनेक वाहने आगीच्या भक्ष्यस्थानी पडली. स्थानिक नागरिक, दत्तवाडी पोलिस व अग्निशमन दलाने अर्धा ते पाऊण तासात आग आटोक्यात आणली. त्यामुळे मोठा अनर्थ टळला. आगीमध्ये २७ दुचाकी, एक तीन चाकी टेम्पो आणि दोन सायकली जळून खाक झाल्या. यामध्ये १८ दुचाकी पूर्णपणे जळून खाक झाल्या आहेत. इतर गाड्यांना आगीची झळ बसली आहे. यामध्ये चार लाख रुपयांचे नुकसान झाल्याचा प्राथमिक अंदाज आहे.

वाहने पार्किंग केलेल्या ठिकाणी इलेक्ट्रिकल वायर किंवा कचरा असे काही नव्हते. त्यामुळे आग लावण्यात आल्याचा संशय होता. त्यानुसार चौकशी करण्यात आली. दिनेश उर्फ जब्या पाटीलबाबत पोलिसांना माहिती मिळाली. त्यानुसार दत्तवाडी पोलिस ठाण्याचे वरिष्ठ पोलिस निरीक्षक अनिल पाटील याच्या पथकाने त्याला ताब्यात घेतले. त्याच्या अंगावर पेट्रोल पडलेले होते व त्याचा वास येत होता. त्याने एका दुचाकीतील पेट्रोल काढले व ती दुचाकी पेटविल्याचे सांगितले. यापूर्वीही त्याने वाहनाची तोडफोड केली होती. त्याला दारूचे व्यसन आहे. त्याने नशेतच दुचाकी पेटविल्याचे समोर आले आहे. या प्रकरणी उपनिरीक्षक डफळ अधिक तपास करत आहेत.