म. टा. प्रतिनिधी, पुणे
महापालिकेच्या नवीन इमारतीचे उद्घाटन येत्या गुरुवारी (दि. २१) उपराष्ट्रपती व्यंकय्या नायडू यांच्या हस्ते होणार आहे. या इमारतीला अडथळा ठरणाऱ्या दोन्ही कोपऱ्यातील हॉटेलवर कारवाई करण्याचा निर्णय प्रशासनाने घेतला होता. मात्र, मंगळवारी ही कारवाई करताना दुजाभाव करण्यात आला. माजी नगरसेवकाच्या हॉटेलवर कारवाई करून प्रशासनाने ते जमीनदोस्त केले; तर सत्ताधारी भारतीय जनता पक्षाच्या नगरसेविकेच्या नातेवाइकांच्या हॉटेलला अभय देण्यात आले.
पालिकेच्या विस्तारित इमारतीचे काम अंतिम टप्यात आहे. या नवीन इमारतीला अडचणीची असणारी पालिकेसमोरील हॉटेल आणि टपऱ्या काढण्याचा निर्णय घेण्यात आला आहे. ही इमारत अत्यंत देखणी असल्याने अडथळा ठरणारी हॉटेल काढून त्यांना दुसरीकडे जागा देण्याचा निर्णय पालिकेने घेतला आहे. यातील एक हॉटेल मंगळवारी काढण्यात आले. मात्र, सत्ताधारी पक्षामध्ये असणाऱ्या नगरसेविकेने याला जोरदार विरोध केल्याने दुसऱ्या हॉटेलवर कारवाई करण्यात आली नाही. प्रशासनाला दुसरे हॉटेल काढणार का? अशी माहिती प्रशासनाला विचारली असता उडवाउडवीची उत्तरे देण्यात आली. सत्ताधारी नगरसेविकेच्या सासरे हे महापालिकेचे नगरसेवक होते. त्यांच्या नावावर हे हॉटेल आहे. त्यामुळे हे हॉटेल काढण्यास जोरदार विरोध करण्यात आला. त्यामुळे प्रशासनाकडून या ठिकाणी कारवाई करण्यात आली नाही, अशी चर्चा पालिकेत सुरू झाली आहे.
००००
पार्किंगसाठी व्यवस्था
महापालिकेच्या विस्तारित इमारतीच्या कार्यक्रमासाठी उपराष्ट्रपती येत असल्याने या कार्यक्रमासाठी गर्दी होण्याची शक्यता आहे. सुरक्षिततेच्या कारणास्तव या कार्यक्रमासाठी येणाऱ्या नागरिकांसाठी आणि महत्त्वाच्या व्यक्तीसाठी पार्किंगची व्यवस्था पालिकेच्या वतीने करण्यात आली आहे. काँग्रेस भवन, एसएसपीएमएस शाळेचे मैदान आणि कॉलेज ऑफ इंजिनीअरिंगच्या मैदानावर ही व्यवस्था करण्यात आली आहे, असे पालिका प्रशासनाने कळविले आहे.
००००