‘टीप’वसुलीसाठी रेल्वे कर्मचारी ‘पेटले’

प्रवाशांकडून पैसे उकळण्यासाठी केला उद्दामपणा

म. टा. प्रतिनिधी, पुणे

रेल्वे गाड्यांमध्ये तृतीय पंथीयांकडून प्रवाशांची लूट होत असल्याचे प्रकार आपण यापूर्वी अनेकदा ऐकले आणि पाहिले असतील. मात्र, आता रेल्वेचे सफाई कर्मचारी आणि खानपान विभागातील कर्मचारीही प्रवाशांकडे ‘टीप’हट्ट धरत असल्याचे उघडकीस आले आहे. एका प्रवाशाने याबाबतची तक्रार केल्यानंतर ‘इंडियन रेल्वे केटरिंग टुरिझम कॉर्पोरेशन’ने (आयआरसीटीसी) संबंधित कंत्राटदारावर कारवाई केली आहे.
‘दुरांतो’ गाडी निवडक मार्गांवर धावते. त्यामुळे सामान्य एक्स्प्रेस किंवा सुपरफास्ट एक्स्प्रेसच्या तुलनेत या गाडीमधील प्रवाशांना विशेष सेवा देण्यात येतात. त्यामुळे अन्य गाड्यांमध्ये प्रवाशांना होणाऱ्या गैरसोयीच्या तुलनेत ‘दुरांतो’ची सेवा चांगली असल्याचा अनेकांचा समज होता. मात्र, सहा जुलै रोजी धावणाऱ्या हावडा-पुणे दुरांतो गाडीमधील कर्मचाऱ्यांनी प्रवाशांकडून ‘टीप’वसुलीसाठी हट्ट धरल्याचा धक्कादायक प्रकार समोर आला आहे.
नागपूर-पुणे दरम्यान प्रवास केलेल्या प्रणय अजमेरा यांनी रेल्वे मंत्रालय आणि ‘आयआरसीटीसी’च्या ट्विटर अकाउंटवर तक्रार केली. त्याची दखल दोन्ही आस्थापनांनी घेतली. अजमेरा यांच्याकडून त्यांचा ‘पीएनआर’ क्रमांक आणि संबंधित गाडीची माहिती मागवून घेतली. त्या माहितीच्या आधारावर संबंधित गाडीच्या व्यवस्थापनावर दंडात्मक कारवाई करण्यात आल्याचे अजमेरा यांना कळविण्यात आले.
सर्वसामान्य गाड्यांमध्ये भिक्षेकरी किंवा तृतीय पंथीयांकडून पैसे मागितले जातात. मात्र, रेल्वेचे कर्मचारीही त्यांच्या सोबतीला उभारल्याचे प्रथमच पाहण्यात आले. समोरील प्रवासी जोवर पैसे देत नाही, तोवर त्याच्या समोरून हलायचेच नाही, असाच काहीसा पवित्रा रेल्वे कर्मचाऱ्यांनी घेतला. त्यांच्या या वागण्याला घाबरून काही विद्यार्थ्यांनीही त्यांना पैसे दिल्याचे अजमेरा यांनी नमूद केले.

सर्वात आधी वेटरने माझ्याकडे टीप मागितली. त्याला पैसे दिल्यानंतर सफाई कर्मचाऱ्यांनी पैशांसाठी रांगच लावली. त्यांना पैशांसाठी नाही म्हटल्यावर, ते हट्टाला पेटले आणि पैसे द्याच अशी विनवणी करू लागले.
प्रणय अजमेरा,प्रवासी