आरोग्य विभागाची ऑनलाइन विनामूल्य 'ओपीडी'
म. टा. प्रतिनिधी, पुणे
करोनामुळे राज्यात लॉकडाउन सुरू असल्याने काही ठिकाणी खासगी दवाखाने बंद आहेत. त्यामुळे नागरिकांना आरोग्यविषयक तपासणी करण्यात किंवा सल्ला घेताना येणारी अडचण लक्षात घेऊन 'ऑनलाइन ई-संजीवनी बाह्यरुग्ण विभाग' (ओपीडी) सेवा सुरू करण्यात आली आहे. www.esanjeevaniopd.in या संकेतस्थळावर जाऊन रुग्णांनी तज्ज्ञांचा सल्ला घ्यावा, असे आवाहन आरोग्यमंत्री राजेश टोपे यांनी केले आहे.
केंद्र आणि राज्य सरकारच्या आरोग्य विभागाचा हा संयुक्त उपक्रम असून, त्यासाठी रुग्णाकडून कोणतेही शुल्क आकारले जाणार नाही. ही ऑनलाइन ओपीडी सकाळी ९.३० ते दुपारी १.३० या काळात उललब्ध असणार असून, रविवारी सेवा बंद असले. मात्र, टप्प्याटप्प्याने सेवेची वेळ वाढविण्यात येणार असल्याचे आरोग्य विभागाकडून सांगण्यात आले आहे.
गेले काही दिवस प्रायोगिक तत्त्वावर ही सेवा सुरू करण्यात आली. आता मात्र राज्यभर सर्वत्र सेवा सुरू झाली असून, आतापर्यंत सुमारे चारशेहून अधिक रुग्णांना याद्वारे उपचार देण्यात आले आहेत. नांदेड, भंडारा, नाशिक येथील जिल्हा रुग्णालयातील १६ वैद्यकीय अधिकाऱ्यांना 'ऑनलाइन ओपीडी' सेवेचे प्रशिक्षण देण्यात आले आहेत.
या ॲप्लिकेशनच्या माध्यमातून एखादा रुग्ण राज्यातील कोणत्याही जिल्ह्यातून इतर कोणत्याही जिल्ह्यातील वैद्यकीय अधिकाऱ्यांकडून संगणक, लॅपटॉप अथवा मोबाइलचा वापर करून आजारावर सल्ला घेऊ शकतो. थेट व्हीडिओ कॉन्फरन्सिंग, लिखित संदेश याद्वारेदेखील वैद्यकीय अधिकाऱ्यांसमवेत चर्चा करता येईल.
ऑनलाइन सेवा कशी घ्याल?
- नागरिकांना मोबाइल क्रमांकाद्वारे नोंदणी करून, नंतर 'ओटीपी'द्वारे नोंदणीअर्ज भरायचा आहे. त्यानंतर टोकनसाठी विनंती करायची. आजाराबाबत काही कागदपत्रे, रिपोर्ट असल्यास ते अपलोड करता येतील. त्यानंतर एसएमएसद्वारे रुग्णाला त्याचा ओळख क्रमांक आणि टोकन क्रमांक प्राप्त होईल.
- 'लॉग इन' करण्यासाठी 'एसएमएस'द्वारे नोटीफिकेशन येईल. त्यानंतर रुग्णाला दिलेल्या ओळख क्रमांकच्या आधारे लॉगइन करता येईल.
- 'वेटिंग रूम'मध्ये एंटर केल्यानंतर काही वेळातच 'कॉल नाऊ' हे बटन ॲक्टिव्हेट होईल. त्यानंतर व्हिडिओ कॉल करता येईल.
- डॉक्टरांशी चर्चा झाल्यानंतर लगेच रुग्णाला 'ई-प्रिस्क्रिप्शन'देखील प्राप्त होईल.