म. टा. प्रतिनिधी, पुणे
ख्रिश्चन बांधवांचा पवित्र सप्ताह आणि चाळीस दिवसांच्या उपवासाची सांगता रविवारी ईस्टर संडेच्या प्रार्थनेने झाली. येशू ख्रिस्ताच्या पुनरुत्थान दिवसाच्या निमित्ताने कॅथलिक आणि प्रोटेस्टंट अशा दोन्ही संप्रदायांच्या चर्चमध्ये धर्मगुरूंनी करोनाच्या पार्श्वभूमीवर यू ट्यूबद्वारे व्हिडिओच्या माध्यमातून ख्रिश्चन बांधवांना संदेश दिला. सगळ्यांनी घरीच थांबून प्रार्थना केली.
ख्रिश्चन बांधव दर वर्षी ईस्टर संडेची सुरुवात भल्या पहाटे पुनरुत्थान दिंड्यांनी काढून करतात. शहराच्या विविध भागांत या दिंड्या काढल्या जातात. दिंड्यांची सांगता चर्चमध्ये संगीत महाविधी करून होते. यानंतर धर्मगुरू भाकरी आणि द्राक्षाच्या रसाचे वाटप करतात. या वर्षी देशात लॉकडाउन असल्याने धर्मगुरूंनी ख्रिश्चन बांधवांना पाम संडे, गुड फ्रायडे आणि ईस्टर संडे या तिन्ही सणांची प्रार्थना घरीच करण्याचे आवाहन केले होते. शहरातील सर्व चर्चमध्ये सध्या नागरिकांना प्रवेश बंद करण्यात आला आहे. त्यामुळे भक्तांनी यंदा चर्चमध्ये गर्दी केली नाही. सकाळी नऊ वाजता सीएनआय बिशप पॉल दुपारे यांनी या आठवड्याचा संदेश दिला. करोनाचे संकट दूर करून मानव जातीचे संरक्षण कर, अशी प्रार्थना या वेळी प्रभू येशूकडे करण्यात आली."ईस्टर हा ख्रिस्ती लोकांसाठी नाताळएवढाच महत्त्वाचा सण आहे. या दिवशी येशू ख्रिस्त मरणातून पुन्हा उठला, या अद्भुत घटनेच्या स्मरणार्थ हा सण साजरा केला जातो. स्वर्गारोहण होईपर्यंत पुढील चाळीस दिवस ख्रिस्ताने आपल्या शिष्यांसह इतरांना दर्शन दिले. त्यामुळे ख्रिस्त बांधवांनी सकाळी प्रार्थना केली,' अशी माहिती 'चर्च ऑफ द होली नेम'चे सहसचिव सुधीर चांदेकर यांनी दिली.