रँकिंग प्रक्रियेत बदल

विद्यापीठांच्या गुणवत्तेबाबत प्रकाश जावडेकर यांची माहिती

म. टा. प्रतिनिधी, पुणे
‘केंद्रीय मनुष्यबळ विकास मंत्रालयाच्या नॅशनल इन्स्टिट्यूशनल रँकिंग फ्रेमवर्कमध्ये (एनआयआरएफ) कॉलेज व विद्यापीठांची गुणवत्तेनुसार क्रमवारी (रँकिंग) तयार करण्याच्या प्रक्रियेत येत्या वर्षापासून बदल करण्यात येईल. ‘एनआयआरएफ’च्या सुधारणेसाठी हे पाऊल उचलण्यात येईल,’ अशी माहिती केंद्रीय मनुष्यबळ विकास मंत्री प्रकाश जावडेकर यांनी रविवारी पत्रकारांना दिली.

पुण्यात एका कार्यक्रमानिमित्त आले असता, त्यांनी पत्रकारांशी संवाद साधला. ‘एनआयआरएफ’च्या रँकिंग प्रक्रियेत बड्या खासगी कंपन्यांनी विद्यापीठ आणि कॉलेजांना क्रमवारीत आघाडीचा क्रमांक मिळवून देण्यासाठी हस्तक्षेप केल्याचा आरोप होत आहे. त्याबाबत विचारले असता, जावडेकर म्हणाले, ‘एनआयआरएफच्या रँकिंग प्रकियेत सुधारणा करण्याचे प्रयत्न सुरू आहेत. त्यासाठी रँकिंग प्रक्रियेत पुढील वर्षापासून बदल करण्यात येईल. मात्र, खासगी कंपन्यांनी कुलगुरू आणि कॉलेजप्रमुखांना ई-मेल आणि मेसेज पाठवले ही माहिती खोटी आहे.’


दरम्यान, ‘एनआयआरएफ’च्या प्रक्रियेत कंपन्यांचा हस्तक्षेप टाळण्यासाठी; तसेच सुधारणेसाठी एकूणच प्रक्रियेत बदल करण्यात येत असल्याची माहिती प्रा. चौहान यांनीही दिली. ‘रँकिंग प्रक्रियेत आघाडीचा क्रमांक मिळविण्यासाठी कुलगुरू व कॉलेजप्रमुखांना ई-मेल आणि मेसेज पाठविण्यात आले. त्यासाठी आकर्षक आर्थिक पॅकेजचे आमिष दाखविण्यात आले,’ अशी माहिती एका कुलगुरूंनीच दिली होती.

‘नॅक’ची प्रक्रियाही बदलणार

‘कॉलेज आणि विद्यापीठ तपासणीची ‘नॅक’ची प्रक्रिया अधिक पारदर्शी होण्यासाठी येत्या काही दिवसांमध्ये या प्रक्रियेत बदल होणार आहेत. माहिती तंत्रज्ञानाचा (आयटी) अधिक वापर करून प्रक्रियेतील क्लिष्टपणा काढून टाकण्यात येईल; तसेच ‘नॅक’ला खोटी माहिती देणारी कॉलेजे आणि विद्यापीठांची मान्यतादेखील रद्द होणार आहे,’ अशी माहिती राष्ट्रीय मूल्यांकन आणि अधिस्वीकृती परिषदेच्या (नॅक) कार्यकारी समितीचे अध्यक्ष प्रा. व्ही. एस. चौहान यांनी दिली.