साडेआठ हजार पोलिस तैनात

चोरी रोखण्यासाठी विशेष पथके; चौकाचौकात बंदोबस्त

म. टा. प्रतिनिधी, पुणे

नववर्षाच्या स्वागताला कोणताही अनुचित प्रकार घडू नये म्हणून पुणे पोलिसही सज्ज झाले आहेत. ‘थर्टी फर्क्ट’च्या रात्री पुणे आणि पिंपरी चिंचवडमध्ये रस्त्यावर साडेआठ हजार पोलिसांचा बंदोबस्त तैनात राहणार आहे.
गर्दीमध्ये चोरीच्या घटना रोखण्यासाठी गुन्हे शाखेची पथके गर्दीमध्ये फिरणार आहेत. तसेच, महिलांची छोडछाड आणि टिंगल रोखण्यासाठी महिला अधिकाऱ्यांची चार पथके कार्यरत राहणार आहेत. वाहतूक पोलिसांकडून चौकाचौकात बंदोबस्त करण्यात येणार असून, ड्रंक अँड ड्राइव्हची कारवाई करण्यात येणार आहे. मद्यपान करून वाहने चालवू नका, असे आवाहन पोलिसांकडून करण्यात आले आहे.
थर्टी फर्स्टच्या रात्रीचे विविध पद्धतीने नियोजन सुरू आहे. नवीन वर्षाच्या स्वागताची जय्यत तयारी जात आहे. स्थानिक पोलिसांना अलर्ट राहून योग्य नियोजन करण्याच्या सूचना देण्यात आल्या आहेत. तसेच, गुन्हे, विशेष शाखेची २३ पथके तयार करण्यात आली आहेत. त्यातील नऊ पथके झोनला बंदोबस्ताच्या मदतीसाठी देण्यात आली आहेत. दहा पथके शहरात वेगवेगळ्या ठिकाणी तैनात करण्यात आली आहेत. छेडछाड, महिलांना त्रास देणाऱ्यांचा बंदोबस्त करण्यासाठी महिला अधिकाऱ्यांची चार पथके तयार करण्यात आली आहे. प्रत्येक झोन एक पथक देण्यात आले आहे. या पथकामध्ये दहा महिला कर्मचारी एक अधिकारी राहणार आहे.
राज्य उत्पादन शुल्क विभागासोबत चार पथके राहून कारवाई करणार आहे, अशी माहिती गुन्हे शाखेचे पोलिस उपायुक्त पंकज डहाणे यांनी दिली. फग्युर्सन रोड, कॅम्प परिसर, कल्याणीनगर या भागात होणारी गर्दी पाहता पोलिसांची अधिक कुमक ठेवली जाणार आहे. पोलिस आयुक्त रश्मी शुक्ला, सहआयुक्त रवींद्र कदम यांच्यासह दोन अतिरिक्त आयुक्त, नऊ पोलिस उपायुक्त, १७ सहायक आयुक्त, दीडशे पोलिस निरीक्षक, साडेआठ हजार पोलिस कर्मचारी बंदोबस्तासाठी तैनात राहणार आहेत. नागरिकांनी मद्यपान करून वाहने चालवू नयेत. अडचण आल्यास तत्काळ जवळच्या पोलिसांकडे संपर्क साधा, किंवा पोलिस नियंत्रण कक्षाशी संपर्क साधावा, असे आवाहनही डहाणे यांनी केले.

वाहतूक शाखेचा स्वतंत्र बंदोबस्त
आज रात्री वाहतूक शाखेचा वेगळा बंदोबस्त राहणार आहे. शहरातील चौकाचौकात वाहतूक पोलिस कार्यरत राहणार आहेत. एक पोलिस उपायुक्त, चार सहायक आयुक्त, २२ पोलिस निरीक्षक, ३५ सहायक निरीक्षक, उपनिरीक्षक बंदोबस्तासाठी तैनात राहणार आहेत. ५६ ब्रेथ अॅनालायझरच्या मदतीने सर्व विभागात ड्रंक अँड ड्राइव्हची कारवाई केली जाणार आहे. गेल्या महिन्याभरात तीन हजार जणांवर ड्रंक अँड ड्राइव्हची कारवाई करण्यात आली. त्यामुळे नागरिकांनी मद्यपान करून वाहने चालवू नये, असे आवाहन वाहतूक शाखेचे उपायुक्त अशोक मोराळे यांनी केले.